Кĕçнерникун, раштавăн 9-мĕшĕнче, Чăваш чĕлхин пĕрлехи комиссийĕн черетлĕ ларăвĕ иртрĕ. Унта комисси йышĕпе пĕрле Чăваш патшалăх гуманитари институчĕн директорĕ Юрий Исаев, чĕлхе пĕлĕвĕ пайĕн ĕçтешĕ Александр Кузнецов тата Чăваш патшалăх педагогика университечĕн кафедра пуçлăхĕ Пётр Метин хутшăнчĕç.
Пухăннисем хальхинче чăваш шкулĕсенчи тăван чĕлхепе çыхăннă лару-тăрăва сӳтсе яврĕç, ку тĕлĕшпе вырăнти хăйтытăмлăх органĕсемпе çыхăну йĕркелеме палăртрĕç. Яланхи пекех тĕп вырăнта çĕнĕ терминсене пăхса тухса çирĕплетесси пулчĕ. Чи малтанах 4-мĕш класра вĕренекен „Православи культури никĕсĕн" Геннадий Дегтярёв куçарса хатĕрленĕ тĕн терминĕсене (ачасене, тĕслĕхрен, „милосердие" ăнлава хаçат-журналти пек „ыркăмăллăх" тесе мар, „хĕрхенекен кăмăл" тесе вĕрентĕç; „православи" термина чăвашла чиркӳ кĕнекисенчи пек „чăн тĕн" тесе мар, „православи" тесех палăртĕç) усă курма йышăнчĕç. Унтан Пётр Метин профессор шкул кĕнекисенчи литература терминĕсемпе паллаштарчĕ. Комисси пайташĕсем палăртнă тăрăх пĕр ăнлавах 3-4 тĕрлĕ палăртни ачасене хăтлă пĕлӳ илме чăрмантарать. Малашне кĕнеке авторĕсем Комисси çирĕплетнĕ терминсемпе кăна усă курма пуçлĕç.
Пухăннисем юлашкинчен Комиссин çитес ларăвĕн кун йĕркине йышăнчĕç. Яланхи ыйтусемпе пĕрлех унта Чăваш Республикин чĕлхесем çинчен калакан саккунĕ республикăри культура учрежденийĕсенче мĕнле пурнăçланса пынине те сӳтсе явĕç.
Ларура йышăннă документсемпе эсир çитес вăхăтра
Комисси сайтĕнче паллашма пултаратăр.
