Ăшă, ырă туйăмпа

Саламлатпăр уявпа.

Эсĕ паян – юбиляр,

Пур тăвану – юнашар.

Ылтăн уяв сан паян,

Хăв та ылтăн эс ялан.

Тăвансем те ылтăн сан – 

Савăн, хĕпĕрте чунтан.

Ак тултартăн 50 çул – 

Çур ĕмĕр вăл ним те мар.

Умра – тепĕр 50 çул.

Çавăнпа эс ан кулян.

Çамрăк пулсан чунпала

Ватлăх илеймест сана.

Хăвăн тăрăх пăхкала – 

Халь те çамрăк пек тăран.

Ĕмĕтленме ан ÿркен.

Ĕмĕтленни вăл – çитет.

Чун хавалне çирĕплет – 

Тапса тăтăр çăлкуç пек.

Чăн-чăн арçын пурнăçра

Йывăç лартать, пÿрт лартать.

Ача-пăча çуратса

Ура çине тăратать.

Эсĕ хăвăн тивĕçне

Пурнăçа кĕртсе пыран.

Апла чăн-чăн арçын эс – 

Алă çупса саламлар.

Малалла та пĕр-пĕрне

Юратса та пулăшса,

Сăмахсăрах ăнланса

Килĕштерсе пурăнар.

Телей кÿччĕр ачасем,

Савăнтарччăр мăнуксем.

Умра пулччăр тăвансем,

Ĕçтешсем, тус-юлташсем.

Çирĕп сывлăх, ăраскал,

Тулли пурнăç та вăй-хал.

Пултăрччĕ ырри кăна, 

Турă пулăштăр сана.

Салампа - çывăх тăванусем.

Учитель, шыравçă, тĕпчевçĕ, çыравçă («Сельская жизнь (Ял пурнăçĕ)», Красноармейское ) 

Авăн уйăхĕн 5-мĕшĕ, 2008 çул, эрнекун

Кăçалхи çурла уйăхĕн 22-мĕшĕ. Халăх пултарулăхĕн районти çурчĕ. Педагогсен августри йăлана кĕнĕ районти конференцийĕ пырать. Тĕп доклад хыççăн тухса калаçасси пуçланчĕ. Трибуна умне черетпе виççĕмĕш Красноармейскинчи 2-мĕш вăтам шкулта чăваш чĕлхипе литературине, тăван ен культурине тата обществознанине вĕрентекен В. М. Михайлов тухрĕ. Вăл вĕрентĕве модернизацилес ыйтупа хăйсем епле ĕçленипе паллаштарчĕ, сĕнÿсем те пачĕ.

...Виталий Михайловича темиçе çул та пĕлетĕп ĕнтĕ. Ăшă кăмăллă, чун-чĕрипе тарават пулнăран килĕшет вăл мана. Ытахальтен мар-тăр педагог профессине суйласа илнĕ Çырмапуç Карай каччи. 
Виталий Михайлович 24 çул каялла И. Н. Ульянов ячĕллĕ Чăваш патшалăх университетĕнчен вĕренсе тухнă. Чăваш чĕлхипе литератури, тăван ен культури тата экономика темипе 16 методика брошюрипе пособи çырса хатĕрленĕ вăл. Кунсăр пуçне "Такмаксем” фольклор пуххин (сборникĕн) авторĕ те, Николай Карай ентеш- поэтăн "Ял-йыш саламĕ” сăвăсен пуххин редакторĕ те. 

В. М. Михайлов Красноармейскинчи 2-мĕш вăтам шкулта 1992 çултанпа вăй хурать. Пĕтĕм тĕнчери Экономика тата Вĕрентÿ Бизнесĕн Центрĕнче "Хальхи экономика” программăпа ятарлă курсра вĕреннĕ. Пĕтĕм Раççейри "Çулталăкри учитель — 1997” конкурса хутшăннă. "Çулталăк шкулĕ — 2000” республика конкурсĕн лауреачĕ. "Чи лайăх класс ертÿçи — 2008” районти конкурсра 2-мĕш вырăна тивĕçнĕ, республикăри конкурс финалисчĕ. Вăл вĕрентнĕ тата вĕрентекен ачасем географипе тата экономикăпа республикăра ирттернĕ олимпиадăсенче пĕр хут çеç мар призерсем пулса тăнă. 

Чи пысăк квалификациллĕ учитель ĕçре яланах çĕнĕ мелсем шырать, вĕсене пурнăçа кĕртме çине тăрать. Унăн урокĕсем содержани тĕлĕшĕнчен çÿллĕ шайра, интереслĕ тата асра юлмалла иртеççĕ. Тăтăшах дидактика материалĕсемпе, чăваш чĕлхи урокĕсенче вара опорлă сигналсемпе, блок-схемăсемпе, таблицăсемпе, тест тата пултарулăх заданийĕсемпе усă курать. Вĕренекенсен психологи уйрăмлăхĕсене пĕлни, педагогикăри çĕнĕ технологисемпе методикăна ĕçе кĕртни Виталий Михайловича ÿсĕмсем тума пулăшаççĕ те ĕнтĕ. 

Педагог стандартлă мар уроксен активлă формисемпе усă курать. Унăн пултарулăх лабораторийĕ те пуян. Уроксенче вĕрентĕвĕн техника хатĕрĕсемпе, çав шутра компьютерпа та, усă курать, мультимедиллĕ материалсем, калăпăр, К. В. Иванов, Çеçпĕл Мишши, Петĕр Хусанкай, Д. Исаев-Авраль, Юрий Сементер, Элли Юрьев пултарулăхне сăнлакан слайдсем хатĕрленĕ. Унăн ырă опычĕпе паллашма урăх çĕрти ĕçтешĕсем те килсе çÿреççĕ. Акă, Сĕнтĕрвăрри районĕнчи, Пушкăртстанри чăваш чĕлхипе литературин учителĕсем В. М. Михайлов урокĕсене пысăка хурса хакларĕç. Районти чăваш чĕлхипе литературине, тăван ен культурине вĕрентекен учительсен пултарулăх ушкăнĕн членĕ пулнă май, Виталий Михайлович "Уçă урок планĕсем” методика пособийĕ редакцилесе кăларнă. Вăл — обществознанипе, экономикăпа тата правăна вĕрентессипе элективлă тата профиллĕ курссен авторĕ те. 

Пултаруллă педагог ертсе пынипе ачасем тĕпчев ĕçĕсем те çыраççĕ. Ав, "Эткер” ирттернĕ "Манăн кил тата манăн тăвансем” конкурсра "Хавал” кружок членĕсем Наташа Порфирьевапа Ольга Николаева 2—3-мĕш вырăнсене çĕнсе илнĕ. А. С. Пушкин çуралнăранпа 140 çул çитнине халалланă ăслăлăхпа практика конференцийĕнче вара Наташа Порфирьева "Чăвашсен этнокультури тата экологи” докладпа 2-мĕш вырăна тивĕçнĕ. Алина Михайлова, Оксана Ивановапа Алина Федорова ĕçĕсене К. В. Иванов ячĕллĕ литература музейĕнче кăтартнă. Евгения Кускова чăваш классикĕ К. В. Иванов çуралнăранпа 115 çул çитнине халалланă республикăри уçă конкурсăн "Экскурси” номинацийĕнче пĕрремĕш вырăна тухнă. Ольга Васильевапа Майя Литова "Exselsjor — 2003” конференци-фестивальте пĕрремĕшсем пулса тăнă, диплома тата "Тăван çĕр шывăн пулас лидерĕсем” ылтăн медале тивĕçнĕ. Виталий Михайлович вĕренекенĕсем — Мальвина Спиридонова, Татьяна Андреева, Маргарита Иванова, Анастасия Павлова, Наталия Григорьева, Наташа Иванова, Алексей Михайлов, Павел Данилов, Михаил Петров, Серафима Григорьева, Марина Афанасьева, Евгения Филимонова, Элеонора Гаврилова тата ыттисем те тĕрлĕ шайри конкурссенче палăрнă. Экономика учителĕ те пулнă май, В. М. Михайлов ачасем рынок экономики хуçаланнă тапхăрта çухалса ан кайччăр тесе тимлет. Унăн вĕренекенĕсем çуллен пултарулăх, ăслăлăхпа тĕпчев ĕçĕсем — бизнес-плансем, бизнес-проектсем, бизнес-идейăсем тата авторефератсем хатĕрлесе хÿтĕлеççĕ. Калăпăр, Евгений Хитрин, Алексей Григорьевпа Виталий Яковлев, Татьяна Андреева, Вероника Юзько ĕçĕсем тĕрлĕ шайра палăрнă. 2003 çулта, сăмахран, Сергей Васильев обществознани, экономика тата право енĕпе йĕркеленĕ олимпиадăра пĕрремĕш пулнă, Татьяна Григорьева 2005 тата 2006 çулсенче 7-мĕш тата 5-мĕш вырăнсене тивĕçнĕ. Светлана Нестерова, Наталия Григорьева, Наталья Иванова, Марина Данилова — обществознанипе Пĕтĕм Раççейри дистанци олимпиадине, Ксюша Васильева, Кристина Артемьева, Наталия Григорьева, Наталья Иванова, Наташа Малинина, Елена Семенова, Алена Якимова çамрăк журналистсен Пĕтĕм Раççейри интернет-олимпиадине хутшăннă. Класс ертÿçи пулнă май, Виталий Михайлович вĕренекенсен обществăри активлăхне, яваплăхне, интеллектуаллă пултарулăхне хăпартас тĕлĕшпе çине тăрать. Воспитани ыйтăвĕпе вăл час-часах усăллă сĕнÿ-канашсем парать. В. М. Михайлов ачана уйрăммăн аталантарас енĕпе — комплекслă воспитани, ача çемйипе ĕçлес тĕлĕшпе ятарлă программăсем туса хатĕрленĕ. Унăн вĕренекенĕн ĕç-хĕлĕн мониторингĕн, рейтинг карттипе портфолион (ÿсĕмсен папкин) ĕç опытне пĕтĕмлетнĕ тата ытти ĕçтешĕсем хушшинче сарма йышăннă. В. М. Михайлов обществăллă пысăк ĕç тунипе те палăрса тăрать. Вăл — Нестер Янкас ячĕллĕ районти культура, искусство тата литература пĕрлĕхĕн членĕ, Чăваш Наци Конгресĕн активисчĕ. Виталий Михайлович халăх сăмахлăхне пухас тĕлĕшпе те нумай вăй хурать. Кунсăр пуçне маттур учитель "Халăх йăли-йĕрки — пурнăç тĕрекĕ” проект авторĕ тата ертÿçи. Çак проект 2005 çулта класс тулашĕнчи мероприятисен сценарийĕсен республикăри конкурсĕнче пĕрремĕш вырăн йышăннă. Пултарулăхри ÿсĕмсемшĕн ăна районти Н. Янкас премине те панă. "Вĕрентÿ” наци проектне пурнăçлас çĕрти çитĕнÿсемшĕн район пуçлăхĕн премине тивĕçнĕ. Вĕрентÿпе воспитани ĕçне çĕнĕлĕхсем кĕртес енĕпе палăрнăшăн вара Виталий Михайловича Раççейри тата Чăваш Енти Вĕрентÿ министерствисен Хисеп грамотисемпе чысланă. Пĕлтĕр вăл Раççей Федерацийĕнчи чи лайăх учительсен конкурсне хутшăннă, 100 пин тенкĕ премине тивĕçнĕ. Çавăн пек çын, маттур педагог вăл. Малашлăха çирĕппĕн ĕненсе пăхать. Çак кунсенче унăн пурнăçĕнче сумлă пулăм пулчĕ: 50 çул тултарнине паллă турĕ. Çавна май тата çĕнĕ вĕренÿ çулĕ пуçăннă ятпа эпĕ те Виталий Михайловича пур кăмăлтан ăшшăн саламлатăп, çитĕнекен ăрăва вĕрентсе воспитани парас çĕрте çĕнĕрен те çĕнĕ çитĕнÿсем туса пыма ырлăх-сывлăх, вăй-хăват, телей, пархатар сунатăп.В.М.Данилов