Плиссе юбкăсемпе кĕпесем ку çулла çав тери модăра пулчĕç. Хĕрсемпе хĕрарăмсем ăна тивĕçлипе хакланине кура дизайнерсем çак темăна кĕркунне те тăсма шутланă. Костюмсен юбкисем пĕтĕмпех пĕрĕмлĕ е арки кăна. Арçыннăнни евĕрлĕ кĕлеткеллĕ хĕрарăмсемшĕн плиссе чăн-чăн çăлăнăç. Вăл вĕсен хĕрарăмлăхне уçса кăтартать, çепĕçрех те илĕртӳллĕрех тăвать. Çӳллĕшĕпе пĕчĕккисене вара плиссе юбка е кĕпе яштакарах, урасене вăрăмрах тăвать. Груша евĕрлĕ кĕлеткеллисен ку тума тăхăнма тăхтамалла, мĕншĕн тесен пĕрĕмлĕ япалапа вĕсем тата та сарлакарах курăнаççĕ. 
Çулла вĕçленнĕ май ирлĕ-каçлă çанталăк та сулхăнланса пырать. Ку чухне хĕрсен гардеробĕнче чи кирлĕ тумтирсенчен пĕри – кардиган. Ăна шăлаварпа та, юбкăпа та, кĕпепе те, джинспа та тăхăнма пулать. Чи лайăххи – хура тĕсли, мĕншĕн тесен ăна кашни тĕспе килтерме пулать. 
Çулла тумтирпе аксессуарсем çăмăлттайрах пулни те вырăнлă-тăк, кĕр енне эпир сапăрлăх патне туртăнма пуçлатпăр. Сумка пирки сăмах хускатас пулсан, модăна каллех хытă формăллисем кĕрсе пыраççĕ. Кĕркунне лăпкăрах тĕслĕ аксессуарсем суйламалла, пляж сумкисем ку вăхăтра кулăшла курăнаççĕ. 
Легенсы юратакансене савăнтаратăп, вĕсем çавăн пекех модăра. Анчах асăрхаттарас та килет: чĕнтĕрленĕ вĕçлĕ легенсы çамрăк хĕрсене кăна килĕшет тата ташă каçне е уява кайма çеç юрăхлă, куллен кун тата ĕçе çӳреме хура тĕслĕ, витĕр курăнманнине суйламалла. Хăш-пĕри çак тума кĕске блузкăпа тăхăнма хăюлăх çитерет. Анчах та кĕлетке тем тери яштака пулсан та легенсы шăлавар мар. Ăна вăрăм туникăпа е кĕске кĕпепе тăхăнмалла. Унсăрăн: «Пикеçĕм, эсĕ юбка тăхăнма маннă-им?» – тесе ыйтнине илтме тӳр килĕ. 
■ САЛАМПИ.