Интернетра "Пĕтĕм Раççейри 2010 çулхи халăх çыравĕ” портала уçнă. Сайт адресĕ — www.perepis-2010 ru. Тĕп страницăра Раççейĕн кашни çыннине чĕнсе каланă: "Çырав — çĕр-шывăн коллективлă портречĕ. Сирĕнсĕр ку ÿкерчĕк тулли пулмасть. Çырава хутшăнăр, ку пачах йывăр мар”.

Порталăн тытăмĕ питех те ансат, çавăнпа интернетпа пуçласа усă куракан та çырав çинчен мĕн пĕлес килнине тупать. "Çĕнĕ хыпар” ("Новости”) рубрикăри материалсем тăтăшах çĕнелсе тăраççĕ. Унсăр пуçне çыравăн саккун никĕсĕ тата программи çинчен тулли информаци илме пулать, иртекен мероприятисен анонсĕпе отчечĕ, тĕрлĕ справка материалĕсем, Раççейри тата СССРти халăх çыравĕсен историйĕ çинчен калакан интереслĕ фактсем, çыравсен чикĕ леш енчи опычĕ вырăн тупнă.

"Ыйтусем тата хуравсем” рубрикăра интернетпа усă куракансем çырав хучĕн содержанийĕпе малтанах паллашма, илнĕ кăтартусен вăрттăнлăхне сыхлани пирки пĕлме пултараççĕ. "Çырав тата харпăр хăй хăрушсăрлă-хĕ” пая ятарласа харпăр хăй кăтартăвĕсем урăх алла лекессинчен хăрани вырăнсăр пулнине кăтартма тунă. Кунтах çыравпа час-часах паракан ыйтусене хуравлаççĕ: çырав мĕн тума кирлĕ, ăна миçе çулта пĕрре ирттереççĕ, çырав хучĕн анкетине тултарма мĕн чухлĕ вăхăт каять.

"Халăх сасси” пайра социаллă ыйтăмсен (опрос) граждансем çырав çинчен пĕлни тата унта хутшăнма хатĕр пулни пирки калакан кăтартăвĕсене пичетлеççĕ. Портала кĕрекенсем форума хутшăнма тата çыравпа çыхăннă ыйтусемпе хăйсен шухăшне пĕлтерме пултараççĕ. "Усăллă илсе кăтартнисем” пайра Росстатăн территорисенчи мĕн пур органĕсен адресĕсене пухнă. Малалла сайтра çырав темипе "флеш” технологипе усă курса интерактивлă компьютер вăййисене хатĕрлесе вырнаçтарĕç, викторинăсем тата ытти мероприятисем те пулĕç. Ытти Интернет-ресурсемпе усă курса çĕнĕ хыпарсене пĕлĕç. Сайтрах аудио тата видеоматериалсене итлеме тата курма пултарĕç, кирлĕ пулсан копи туса илме те май пулĕ. Çырав пирки ыйту çуралсан, сайт адресĕпе çыру çырма е форумра хăйсен шухăшне хăварма пултарĕç.

Аса илтеретпĕр, унчченхи çырав 2002 çулта пулнă. Иртнĕ сакăр çулта Раççейре интернетпа усă куракансен шучĕ чылай ÿснĕ, çавăнпа çырава йĕркелекенсем ăнлантару ĕçне интернет-ресурспа туса пырассине те манăçа хăвармаççĕ. Федераллă "Çырав” пресс-центрĕн официаллă perepis-2010. livejournal. com блогĕ ĕçлет, "Новости” информаци агенствин сайтĕнче http://www. rian. ru/ trend /population_census_ 12112009/ ятарлă рубрика уçнă.