Паян Лапсарта чăваш тетелĕн хастарĕсем тĕл пулчĕç. Нумайăнах пухăнаймарĕç пулин те, сахал мар ыйту сӳтсе яврĕç. Пухăва Admin (Николай Плотников), allboru (Александр Блинов), ned (Эдуард), alex-net (Алексей Михайлов), mixaj_58 (Виталий Михайлов) килчĕç, ыттисем тĕрлĕ сăлтава пула килеймерĕç.

Чăваш тетелне аталантармалли cĕнÿсем чылай пулчĕç: пĕрисем влаçран пулăшу ыйтмамасăрах, халăха тÿрремĕн йĕркелесе ĕçлеме сĕнчĕç (тĕслĕхрен, студентсене явăçтарсан питĕ лайăх), теприсем вара, влаçри çынсемсĕр (адмресурссăр) аякка кайма çукки пирки пĕлтерчĕç — вĕсемпе тачăрах çыхăну тытма сĕнчĕç. Чăваш тетелне малалла аталантармашкăн çĕнĕ организаци тумалли пирки нихăшĕ те хирĕçлемерĕ — ку ыйтăва Атăл леш енче ирттерме палăртнă чăваш чĕлхине вĕренме кăмăл тăвакансен çуллахи лагерĕнче татса пама тĕв турĕç.

Чăваш халăх сайчĕн ĕçне тишкерчĕç — канашлура калаçу сӳнме пуçлани, ыйтусене сахалрах сӳтсе явни халăх ывăннинчен килет тесе палăртрĕç. Сайтра хăнасене тытса тăмашкăн ытларах хыпарсем пичетлеме, курмасем (видео) вырнаçтарма сĕнчĕç. Хыпарсене рассылка урлă пĕлтерсен те япăх пулмĕ терĕç.

Хыпарсене сӳтсе явассине сайтран канашлăва куçарма сĕнчĕç — ку канашлăва та, сайта та усă парĕ терĕç. Чăваш халăх сайчĕ ĕçлеме тытăннăранпа 5 çул çитнĕ май ун кĕпине, дизайнне кăшт улăштарсан питĕ усăллă пулĕччĕ тесе палăртрĕç. Сайт ĕçлеме пуçланăранпа 5 çул çитнĕ тĕле конференци е çавра сĕтел йĕркелеме сĕнчĕç.

Ачасене чăваш чĕлхипе интереслентересси пирки те калаçу пычĕ — чăваш ачисем чăвашла калаçчăр тесен компьютер вăййисем тусан питĕ лайăх пулĕччĕ терĕç. Вăйăсене тума студентсем хушшинче конкурс ирттерсен меллĕ пулнине палăртрĕç. Малтан вăййи пĕчĕк пулсан та хăрушă мар — пысăкраххине каярах, вăй илсен тума сĕнчĕç. Мульфильмсене чăвашла куçарни те ачасене чăваш чĕлхи патне туртăнма пулăшĕ тесе палăртрĕç. Çапах та куçарнă чухне вырăсла куçарăвĕ çуккине çеç чăвашлатмалла терĕç — унашкал темиçе мультфильма суйласа та илнĕ иккен, куçару ĕçĕ пырать.

Çак ыйтусене сӳтсе явнă хыççăн хăнасем килĕсенелле саланчĕç.