Ака уйăхĕн 18-22-мĕшĕсенче республикăмăрта педагогсен чăвашла хатĕрленĕ сайчĕсен конкурсĕ иртрĕ. Ăна Чăваш чĕлхин кунне халалласа Чăваш Республикин вĕренӳ тата çамрăксен политики министерстви, Вĕренӳ институчĕ, Чăваш чĕлхин инçет вĕренӳ центрĕ ирттерчĕç. Пилĕк кун хушшинче сасăлава 469 çын регистрациленнĕ. Вĕсенчен 19-ăшĕ сасăлава хутшăнас темен, 30-ăшĕ хăйсен сассине пĕр сайта та паман. Пĕрремĕш вырăна 114 сасă пухса Краснормейскинчи 2-мĕш шкулта ĕçлекен Виталий Михайлович Михайлов тухнă, иккĕмĕш вырăнта — Йĕпреçри пěтĕмěшле пĕлӳ паракан 2-мĕш номерлě вăтам шкулта ĕçлекен Ядрицова Алена Андреевна (101 сасă), виççĕмĕш вырăнта — Канаш хулинчи пĕтĕмĕшле пĕлӳ паракан 6-мĕш вăтам шкулта тăрăшакан Нина Спиридоновна Ершова (65 сасă). Хам енчен çакна калас тетĕп: кам маншăн сасăланă, ман ĕçе тивĕçлĕ хак панă - вĕсене пурне та пысăк тав. Уйрăмах - Красноармейски иккĕмĕш шкулĕн вĕренекенĕсемпе вĕрентекенĕсене тата мана аван пĕлекен, чун-чĕререн хисеп туса чыслакан мĕн пур ырă çынна. Конкурса йĕркелекенсене те пысăк тав. Вĕсем: Чăваш халăх сайчĕн администраторĕ Николай Плотников тата Чăваш чĕлхин инçет вĕренÿ центрĕн директорĕ - Владимир Андреев. Вĕсене чăваш чĕлхин сумне çĕклес ĕçре пысăк тÿпе хывса ырми-канми ĕçленишĕн Турă пархатар, ырлăх-сывлăх парса тăтăр. Тавах!