Тĕнче тетелĕнче чăвашлăхпа çыхăннă япаласем туянма çăмăл мар. Электронлă лавкка тумалли пирки чылайăшĕ калаçрĕ пулин те, чăн-чăн ĕçлекенни халь те çук (çармăссен те, тутарсен те пур чухне — эпир вĕсенчен ку тĕлĕшпе юлса пыни намăс :) ). Çакна асра тытса Чăваш халăх сайчĕ «СУМ» ятлă лавкка хатĕрлеме пуçларĕ. Вăл http://www.i-sum.su адреспа ĕçлĕ. Хальлĕхе вăл тĕрĕслев тапхăрĕнче пулин те — тавар туянмалли майсене туса çитернĕ.
Лавккана чăвашла тата вырăсла йĕркелесшĕн, унта тĕрлĕ тавар сутасшăн: кĕнекесем, CD тата DVD дисксем, сувенирсем, тумсем. Хакне май пур таран пĕчĕкрех лартма тăрăшаççĕ — ахаль хавккасенчен йӳнĕрех пулмалла (DVD дисксем, сăмахран, пирĕн 100 тенкĕ кăна!).
Паянхи кун тĕлне лавккара 20 тавартан нумай мар пулсан çитес вăхăтра вĕсен шутне самай ӳстерме шутлаççĕ.
Таварсене почтăпа усă курса Раççейĕн пур тăрăхне те çитерме пултараççĕ. Çавăн пекех Шупашкара тата ун çывăхĕнчи тăрăхсене кил таран çитерсе пама пултараççĕ.
Электронлă лавккапа тунă мĕн пур укçа Чăваш халăх сайчĕн пĕрлĕхне тытса пыма кайĕ.