Тĕнчипе паллă Youtube сервисра «Сăвар» TV канал уçалнă. Ăна уçаканни — чăваш çамрăкĕсен «Сăвар» пĕрлешĕвĕ.
Хальхи вăхăтра интернетри телеканалра Çеçпĕл Мишши çуралнăранпа 111 çул çитнине халалланă митингри (чӳкĕн 16-мĕшĕнче иртнĕ) телекурмасем вырнаçнă. Малашне ку канал урлă ытти мероприятисене лартма палăртаççĕ — тĕслĕхрен, юпан 24-мĕшĕнче иртнĕ деклорацие йышăннăранпа 20 çул çитнине палăртнине, терлĕ çулсенче ӳкернĕ чунçӳреври материалсене. «Сăвар» видеостуди ӳкерме хутшăннă чылай мероприятипе çак канал урлă паллашма май пулĕ. Чӳкĕн 26-мĕшĕнче эпир ирттерекен «Асамлăх çулĕ» кĕнекен хăтлавне те çак канал урлă çутатма палăртаççĕ.
Телеканал тĕллевĕ — май çитнĕ таран чăваш çамрăкĕсен пурнăçĕпе, вĕсен ĕçĕ-хĕлĕпе çыхăннă «Чăваш Ен» ГТРК ӳкермен, çутатман мероприятисемпе паллаштарасси. Канал тӳлевсĕр, унăн материалĕсемпе тĕнчери пур çын та паллашма пултарать — çĕнĕ телекурмасем илсе тăма çырăнмалла çеç.

«Сăвар» пĕрлешĕве 20 çул каяллах йĕркеленĕ. Унăн элтепĕрĕ — Арăслан Наумов (Хусан), Ĕç тăвакан комитет ертӳçи — Илтимер Ефремов. Çак пĕрлешĕве йĕркеленĕ Ультияр Цыпленков унăн хисеплĕ элтепĕрĕ шутланать.