Чăваш Республикин президенчĕн интерактивлă кун кĕнекийĕ уçăлнă. Кун пирки Чăваш Республикинчи влаçри органсен официаллă порталĕ пĕлтерет. Хальлĕхе унта пурĕ 8 уйрăм. Президент Администрацийĕн пресса хĕсмечĕ шантарнă тăрăх унти информаци пуянлансах пырĕ. «Хамăн сăмаха тухса каланă чухне эп Чăваш Енри влаç уçă пулмалли пирки пĕрре мар каланă, калатăп та. Министерствăсемпе ведомствăсем, вырăнти хăйтытăмлăх органсем хăйсене пирĕн республикăра епле кăтарнине, хăйсен ĕçне епле çутатнине эп сăнасах тăратăп — ӳсĕмсем пирки çеç мар пĕлтереççĕ, йăнăшсем пулсан та хăвăрт тӳрлетме тăрăшаççĕ» (куçарăвĕ — Николай Плотниковăн), — çырать Михаил Игнатьев кун кĕнекин пуçламăш страницинче. Малалла Чăваш Ен Президенчĕ влаç уçăмлассине хăйĕнчен пуçлани пирки пĕлтерет, пурне те конструктивлă диалога хутшанма чĕнет. Калаçу усăллă пуласса шанать. Тĕнче тетелне усă куракан пур çын та çак интерактивлă кун кĕнекинче хăйĕн шухăшне пĕлтерме пултарать. Шел те, кун кĕнекине вырăсла çеç калăпланă.
