Чăвашăн сумлă ывăлĕ, вилĕмсĕр классикĕ Çеçпĕл Мишши çуралнăранпа 110 çул çитрĕ. Поэтăн юбилейне чăваш халăхĕ хальхинче те анлăн паллă турĕ. К.Иванов ячĕллĕ Чăваш патшалăх академи драма театрĕнче ноябрĕн 14-мĕшĕнче Çеçпĕл Мишши премийĕн лауреачĕсен уяв каçĕ иртрĕ. 
Писательсемпе поэтсем, культурăпа искусство ĕçченĕсем, вĕрентӳ учрежденийĕсемпе аслă шкулсен культура, филологи уйрăмĕсен студенчĕсем, Шупашкарпа Çĕнĕ Шупашкарти шкулсенче вĕренекенсем, поэтăн пултарулăхĕпе кăсăкланакансем, унăн поэзине пысăка хурса хаклакансем пуçтарăнчĕç унта. 
Уяв каçне паллă юрăç Виталий Адюков авалхи чăвашсен кĕввисемпе уçнă хыççăн ЧР культура, национальноçсен ĕçĕсен, информатика политикин тата архив ĕçĕн министрĕ Роза Лизакова саламларĕ.
Çеçпĕл Мишши фончĕн председателĕ, чăваш халăх поэчĕ Валери Туркай вут чĕреллĕ поэтăн Çеçпĕл Мишшин халалĕсене пурнăçа кĕртме хастар тăрăшнăшăн ТР халăх поэтне, ЧР культурăн тава тивĕçлĕ ĕçченне Ренат Хариса тата писатель-тăлмача Аристарх Дмитриева Çеçпĕл Мишши премине пачĕ. 
Сăмах ăстине халалланă уявра чăваш халăх поэчĕсем Порфирий Афанасьев, Юрий Сементер, ЧР культурăн тава тивĕçлĕ ĕçченĕпе Раиса Сарпипе ЧР искусствăсен тава тивĕçлĕ ĕçченĕ Светлана Асамат, Анатолий Смолин поэт тата ыттисем тухса калаçрĕç. 
Куракансене Çеçпĕл Мишши премийĕн лауреачĕсем: «Уяв» чăваш халăх фольклор ансамблĕ, «Сувар» халăх ташă ансамблĕ, «Эревет» халăх инструменчĕсен ача-пăча тĕслĕхлĕ ансамблĕ, Шупашкарти ача-пăчапа çамрăксен пултарулăхĕн хула центрĕнчи халăх ташшин ансамблĕ, Çеçпĕл Мишши ячĕллĕ Чăваш патшалăх çамрăксен театрĕн пултарулăх ушкăнĕ тата ыттисем хăйсен пултарулăхĕпе паллаштарчĕç. Раççей халăх артисчĕ Петр Заломнов вырăс романсĕсене, Шупашкар çинчен юрăсем юрласа, Аврам Бурундуков баянист чăваш кĕввисене каласа савăнтарчĕ.
Çеçпĕл Мишши çуралнăранпа 110 çул çитнине халалланă уяв мероприятийĕсене ноябрĕн 16-мĕшĕнче Шупашкарти Ленин проспектĕнчи поэтăн палăкĕ умĕнчи митинг малалла тăсрĕ. Сивĕ çанталăка пăхмасăр ЧР Культура, национальноçсен ĕçĕсен, информатика политикин тата архив ĕçĕн министерствин представителĕсем, ăсчахсем, чăваш литераторĕсем, журналистсем, преподавательсем, артистсем, студентсем, шкул ачисем, общественность представителĕсем пуçтарăнчĕç. Валери Туркай, Раиса Сарпи, Светлана Асамат поэтсем, Атнер Хусанкай филолог-ăсчах, артистсем, студентсемпе шкул ачисем тухса калаçрĕç, сăвăсем вуларĕç, чĕрĕ чечексем хучĕç.