Ачана шкула яма тăрсан пĕр çул та кĕнеке хамăр укçа парса туянманни пулман. Е, чим-ха, пулнăччĕ-ха. Пĕрремĕш класа кайнă чух. Ытти чух вĕçĕмех илме тивнĕ. Хăшне-пĕрне çĕннисене, теприсене — усă курнисене. Çĕннисене илме шкултан калатчĕç те — ара, программи çĕнĕ-мĕн тата тем те пĕр… Халĕ вăл вăхăта усал тĕлĕкри пек аса илетĕп.
Кăçал шкула каякансен ашшĕ-амăшĕн вара укçа кăларса хума тивмĕ. Республикăн вĕренӳ министрĕ Владимир Иванов пресс-конференцире мĕнпур ачана шкул кĕнекисемпе тивĕçтерме шантарнă. Ун валли тĕрлĕ хыснаран 200 миллион тенкĕ уйăрнă-мĕн. Министр пĕлтĕр пуçламăш классене кăна тӳлевсĕр шкул кĕнекисемпе тивĕçтерни пирки те аса илтернĕ. Пĕлтĕр, чăн та, пĕрремĕшпе иккĕмĕш класра вĕренекенсене пĕр кĕнеке туянтарман-мĕн, виççĕмĕшпе тăваттăмĕш классне вара тĕп предметсем валли тивĕçтернĕ.
Çыпăçтарнисем: |
