Çак уйăхăн 28-мĕшĕнче Украинăри Козлецки районти Остер хулинче вилĕмсĕр поэтăмăрăн Çеçпĕл Мишшин палăкне уçнă. Ăна хура гранитран тунă. Палăка Çеçпĕл вилнĕ вырăна асăнса лартнă юпапа юнашар вырнаçтарнă. Палăка уçма Чăвашран сумлă делегаци тухса кайнă. Йышра «Канашсем» ентешлĕхĕн пайташĕсем Анатолий Кипеч, Лидия Филиппова тата Юрий Алексеев, Чăваш наци конгресĕн Президиумĕн членĕ Михаил Краснов, Канаш тăрăхĕнчи культура учрежденийĕсенче тăрăшакансем, поэтăн тăванĕ Юрий Кузьмин, Шупашкарти Çеçпĕл Мишши музейĕн заведующийĕ Антонина Андреева пулнă. Чăваш делегацийĕ Украинăна Чернигов облаçĕн Культура департаменчĕ тата Пĕтĕм Украинăри чăвашсен «Çеçпĕл» пĕрлĕхĕ чĕннипе çул тытнă. Палăк çине «...Тусăмсем! Ун чух çул майĕ, ман çине пырса, юрă юрласа кăтартăр, сăвă каласа...» тесе чăвашла, вырăсла, украинăлла тата акăлчанла çырса хунă.
