Шкул вĕренсе тухакан ачасене патшалăх пĕрлĕхлĕ экзамене тытарас саккуна темиçе çул каялла йышăннă пулин те паянхи кунччен те ун тавра иккĕленӳллĕ шухăшсем çӳреççĕ. 
Нумаях пулмасть вĕренӳ тата ăслăлăх пайĕпе ĕçлекен патшалăх канашлăвĕн комитечĕ «Вĕренӳ çинчен» саккуна улшăнусем кĕртме хут çырнă. Çак сĕнӳ хутĕнче вара шкул пĕтерекенсем тытакан пĕрлĕхлĕ патшалăх экзаменне пăрахăçламалли çинчен сăмах пырать. ИТАР-ТАСС палăртнă тăрăх ку хыпара комитетăн председатель çумĕ, КПРФ парти депутачĕ Олег Смолин пĕлтернĕ. 
Смолин шухăшĕпе кашни вĕренекене ППЭ тытнă чухне ирĕк памалла. Унччех маларах «Пĕрлĕхлĕ Раççей» парти депутачĕ, комитетăн председатель çумĕ Надежда Шайденко професионаллă техника училищине кĕрекенсем валли ППЭ тата ППА пăрахăçлама сĕннĕ. Ун шухăшĕпе ун пек ачасен экзамена традициллĕ формăпа тытмалла. 
Смолин каласа панă тăрăх комитет «Вĕренӳ çинчен» саккун валли ытти улшăнусем те хатĕрленĕ. Вĕсемпе вĕренӳ çулĕ пуçланниччен, çурлан 26-мĕшĕнче патшалăх канашлăвĕнче паллаштарĕç.