Акан 24-мĕшĕнче, М.И.Скворцов хатĕрленĕ икĕ томлă Вырăсла-чăвашла сăмах кĕнекин хăтлавĕ иртрĕ. Чăваш чĕлхи кунне халалланăскер Чăваш Республикин Наци вулавăшĕнче кăнтăрла иртни 2 сехетре пуçланчĕ.
Савăнăçлă пухăва филологи ăслăлăхĕсен кандидачĕ, Чăваш патшалăх гуманитари ăслăлăхĕсен институчĕн сăмах кĕнеки, ярăмлă кăларăм тата электронлă энциклопеди пайĕн пуçлăхĕ Дегтяров Г.А. ертсе пычĕ, ĕçтешĕн сулмаклă утăмĕсем çинчен каларĕ, словарь тăвас ĕç йывăр пулнине палăртрĕ.
Пысăк залра лăк тулли халăх. Тухса калаçакансем хушшинче Михаил Ивановичпа пĕрле ĕçленĕ тус-юлташĕсем, тăванĕсем, вĕренекенĕсем пулчĕç. Вĕсем словарь ăстин паха енĕсене палăртса хăварчĕç, сăмах кĕнекине пахаларĕç. Чăваш Республикин Наци библиотекин директорĕ Лизакова Р.М. ăсчаха малалла та ăнăçлă ĕçлеме вăй-хал сунчĕ. Чăваш Республикин вĕрентӳ институтĕнчи чăваш чĕлхипе литература кафедрин доценчĕ Иванова Н.Г. «Вĕрентӳ системинчи чăваш чĕлхипе литератури кафедрин пĕлтерĕшĕ тата М.И. Скворцов профессор» темăпа анлă тухса калаçрĕ, хисеплĕ профессорăмăрăн вышкайсăр пысăк ĕçне хак пачĕ. Шупашкар районĕнчи Кăшавăшри вăтам шкул вĕрентекенĕ Майков Е.А. та хăйĕн сăмахĕнче Михаил Иванович словарь ăсти пулни çинчен тепĕр хут палăртрĕ, шкул ачисен ячĕпе тав каларĕ. Филологи ăслăлăхĕсен докторĕ Н.И. Егоров словарь ĕçĕн паянхи чĕлхе пурнăçĕнчи вырăнĕпе пĕлтерĕшĕ çинчен чарăнса тăчĕ. Чи пĕлтерĕшли — Чăваш Патшалăх Канашĕн депутачĕсен ячĕпе Михаил Иванович Скворцова «М.И.Ломоносов çуралнăранпа 300 çул çитнĕ май» юбилей медалĕпе чысларĕç.
Юлашкинчен пурте пĕрле асăнмалăх сăн çапăнчĕç.
Çыпăçтарнисем: |
