«Ан юлăр кун – çул уттинчен», - тесе чĕнсе каланă çамрăксене кăвар чĕреллĕ Çеçпĕл Мишши. 
  Çав сăмахсене Шупашкарти коопераци интитучĕн студенчĕсем тÿрре кăларма тăрăшаççĕ. Вĕсем Тăван çĕршыври ырă ĕç-пулăмра яланах хастар. Паллах, республикăри паллă кунсене те анлăн чысласси – кунта хисеплĕ тивĕçсенчен пĕри. Чăваш поэзийĕн классикĕ Çеçпĕл Мишши çуралнăранпа 110 çул çитнĕ тĕле тĕрлĕ ĕç туса ирттерме палăртнă. Ăна халалланă литература каçĕ те нумайлăха асра юлĕ.
  Кунта Чăваш халăх поэчĕ, философи ăслăлăхĕсен докторĕ Николай Исмуков Çеçпĕл Мишшин пурнăçĕпе пултарулăхне çĕнĕлле хакласа калаçрĕ. Çамрăксен премийĕн лауреачĕ Анатолий Смолин «çĕнĕ пурнăç юрăçин» сăввисене вырăсла куçарнă, вĕсене вуласа пачĕ. Владислав Пастухов юрист чăн-чăн поэзи çынна ĕмĕр тăршшĕпех тĕрĕслĕхшĕн çине тăма пулăшнине палăртрĕ. Студентсем – пулас экономистсем, бухгалтерсем, финансистсем, юристсем – литература каçне пынисене хытă тĕлĕнтерчĕç. Вĕсем Çеçпĕл Мишшин «Çĕн кун аки» сăввисене чăвашла тата вырăсла çеç мар, çармăсла, тутарла, акăлчанла, нимĕçле, французла чаплă вуларĕç. Институтра тĕрлĕ халăх çамрăкĕсем вĕреннине шута илсен – ытти чĕлхепе те янăрамаллаччĕ вăл. Шел, поэтăн темиçе çул каялла тĕрлĕ чĕлхепе тухнă кĕнекинче йăнăшсем кайни чăрмав кÿчĕ. Халĕ урăх вăхăт – компьютер самани. Çавăнпа корректура йăнăшĕсене тÿрлетсе тата çĕнĕ куçарусем хушса тепĕр кăларăм тухсан питĕ пархатарлă пулĕччĕ. Сăмахран, кĕнекери ярăмсенче нимĕçле сăвă çукчĕ. И.Н. Ульянов ячĕллĕ университет профессорĕ В.А. Иванов пире хăйĕн куçарăвĕпе пулăшрĕ.
  Шупашкарти коопераци институчĕнче литература кружокĕ ăнăçлă ĕçлет. Çавăнпа студентсен кăвар чĕреллĕ поэта халалласа çырнă хайлавĕсем те чăвашла, вырăсла янăрарĕç.
  Литература каçне хутшăннисем çакăн пек пĕтĕмлетÿ турĕç: Çеçпĕл Мишшин çуралнă кунне юбилейрен юбилее кăна мар анлăн палăртмалла. 

В. Кошкин-Кервен, 
Шупашкарти кооперации институчĕ доценчĕ
// Хыпар. – 2009. – 6 октября. – С. 1.