Н.В.Фёдоров пĕлтĕр, 2009 çулта, пурĕ 2 миллион ытла тупăш илнĕ. Кун пирки cap.ru сайт пĕлтерет.
Раççей Федерацийĕн президенчĕн Хушăвĕпе килĕшӳллĕн регион пуçлăхĕсен тата ăна пулăшакансен хăйсен тупăшĕпе пурлăхĕ пирки пĕлтермелле. Хăйсенне кăна мар, çемьери ыттисен пурлăхĕпе тупăшне те шутлама тивет. Çапла май 2009 çулта Чăваш Ен президенчĕ пурĕ 2 миллион та 140 пин те 8 тенкĕ ĕçлесе илнĕ пулать (59 пусне шутламасан). Унăн мăшăрĕ вара вăл вăхăтра 300 пин ытла тупăш тунă. Вĕсен пĕрлехи пурлăхĕ шутне 123 тăваткал метрлă пурăну вырăнĕ кĕрет. Н.В. Фёдоровăн çавăн пекех 94 тăваткал метрлă пурăнман пӳлĕм пур. Арăмĕ çинче икĕ хваттер шутланать: пĕри 88 т.м., тепри — 66 патнелле. Светлана Юрьевнăн çавăн пекех 1400 тăваткал метрлă çĕр, пурăнма юрăхлă çурт тата машин лартмалли вырăн пур. Çĕрпе çурт тата хваттер президент мăшăрĕн пурлăхне пĕлтĕр хутшăннă — вĕсем ăна Кострома облаçĕнче еткер майĕпе лекнĕ.
Правительствăра чи нумай укçа ĕçлесе илекенни — Иван Моторин. Чăваш республикин экономика аталанăвĕпе суту-илӳ Министрĕ пĕлтĕр 4 миллион та 245 пин тенкĕ ытла ĕçлесе илнĕ. Чăваш Ен премьер-министрĕ Нина Суслонова пĕлтĕр миллион çурă ытла тупăш илнĕ. Унăн çемьен пурлăхĕнче 2 хваттер тата гараж шутланать. Президент администрацийĕн ертӳçи пĕлтĕр 955 пин тенкĕ ĕçлесе илнĕ, мăшăрĕ вара икĕ хут ытларах — 1 миллион та 713 пин те 596 тенкĕ. Вĕсен пурлăхĕнче 592 тăваткал метрлă хваттер пур, унта вăл çемйипе пурăнать. Çавăн пекех Тимофеевăн 3 миллион тенкĕ тăракан «Ауди А8» машшин пур. Машăрĕн — «БМВ 525».