Кăмпа - çут çанталăкăн тĕлĕнмелле паха парни. Вăл какай пек юна йÿçĕтмест тата организма шлаксемпе вараламасть. Кăмпасене çут çанталăкăн мини-аптечки тесен те йăнăш мар, мĕншĕн тесен вĕсенче тĕрлĕ чиртен пулăшакан сиплĕ япаласем пур.

КАНЛĔ çывăрма, нервсене лăплантарма ĕлĕк аш кăмпипе /вешенка/ усă курнă. 50 грамм чĕрĕ кăмпана вакламалла, 750 грамм кагора ярса пĕр эрне сивĕтмĕшре тытмалла. Каçхине çывăрма выртас умĕн пĕр черкке /30 мл/ ĕçмелле. Пĕр эрнерен ыйхă йĕркене кĕрет, сăлтавсăр тарăхасси, куççуль юхтарасси иртет.

Урари варикоз сеткисенчен çамрăк хĕрлĕ ăвăс кăмпи /подосиновик/ витĕмлĕ. 5-6 кăмпа шĕлепкине пăтă пуличчен лÿчĕркемелле, вазелинпа маç пуличчен пăтратмалла. Ăна сивĕтмĕшре упрамалла. Маçа урари палăрса тăракан вĕтĕ юн тымарĕсене массаж хусканăвĕсемпе сĕрмелле. 3-4 кунранах вĕсем шупкалма пуçлаççĕ.

Сапаланчăк склероз /рассеянный склероз/ аптратсан типĕтсе çăнăх пуличчен авăртнă 10 грамм чăрăш кăмпине е хыр кăрăçне /рыжик/, 10 грамм шурă кăмпана /белый гриб/, 10 грамм çумăр кăмпине /дождевик/ 750 милилитр кагора ярса 7 кун лартмалла. Кунне 4 хут апатчен 1-ер апат кашăкĕ сывлăх лайăхланма пуçличченех ĕçсе пурăнмалла. Çур çул сипленсен ырă витĕмĕ палăрма кирлĕ.

Урари юн тымарĕсен атеросклерозĕнчен сипленмелли меслет. 200 грамм чĕрĕ шампиньонăн сĕткенне шултрарах ала витĕр юхтармалла. Кăмпа пăтти пулать. Чĕрĕк чей кашăкĕ тăвар, 1,5 чей кашăкĕ лимон йÿçекĕ хушса пăтратмалла, сивĕтмĕше лартмалла. Кунне 2 хут 1-ер апат кашăкĕ 3 кун ĕçмелле. Хатĕр 3 куна çитет. Çĕнĕрен хатĕрлесе 9 кунран кая мар сипленмелле. Эмел питĕ витĕмлĕ: холестерин шайĕ чакать, урасем ыратма пăрахаççĕ.