аштавăн 19-мĕшĕнче К.В. Иванов ячĕллĕ Чăваш патшалăх академи драма театрĕнче Чăваш халăх поэчĕ Ухсай Яккăвĕ çуралнăранпа 100 çул çитнине халалланă савăнăçлă каç иртрĕ. Телее, Ухсай Яккăвĕн ячĕ пирĕншĕн ют мар. Шкул ачисен программинче те пур унăн ĕçĕсем, яш-кĕрĕм çепĕç лирикине килĕштерет, аслă ăру валли — чăвашлăхпа, тăванлăхпа тулнă вун-вун сăвă, поэма, роман. Драматургире, критикăпа публицистикăра нумай тăрăшнă. Ун ячĕ вилĕмсĕр Константин Ивановпа, Çеçпĕл Мишшипе, Петĕр Хусанкайпа, ыттипе юнашар. Эпир ăна вулатпăр, пĕлетпĕр, хисеплетпĕр, çапах та сăмах ăстин поэзи «тарăнлăхне» уçса çитереймен-ха, ун пирки каламалли, ăна тĕпчемелли пайтах.
Халăх поэчĕ ячĕпе йĕркеленĕ каçра та, ăна ЧР культура министрĕ Роза Лизакова ертсе пычĕ, çак шухăша палăртрĕç. Роза Михайловна хăйĕн сăмахĕнче Ухсай Яккăвĕн ятне çĕклес, çитес ăрусем валли упраса хăварас тĕлĕшпе юбилей çулĕнче тунă ĕçсем пирки чарăнса тăчĕ. Ку енĕпе ЧР Президенчĕн Хушăвне пурнăçласа чылай мероприяти ирттернĕ: конференцисемпе куравсем, «çавра сĕтелсем», уçă уроксем... Çак кунсенче вара поэтăн произведенийĕсен пуххи — «Самана» ятпа — кун çути курнă. Ухсай Яккăвĕн юбилейне унăн тăван кĕтесĕнче — Пушкăртстанри Слакпуçĕнче, чăваш тĕпленсе пурăнакан вун-вун хутлăхра паллă тунă.
ЧР Министрсен Кабинечĕн Председателĕн çумĕ — ЧР Элтепĕрĕн Администрацийĕн Ертӳçи Александр Иванов Ухсай Яккăвĕн произведенийĕсем хастар тата харсăр чунлă пулма, тĕрĕс пурăнма вĕрентнине, вĕсем философиллĕ, тарăн шухăшлă пулнине палăртрĕ. «Поэт — литературăн çутă çăлтăрĕ, вăл яланах халăхпа пĕрле пулнă. Çавăнпа унăн ячĕ халăхра ĕмĕр-ĕмĕр пурăнĕ», — терĕ Александр Степанович.
Савăнăçлă каçа Пушкăртстан делегацийĕ те хутшăнчĕ. Делегаци ертӳçи — ПР культура министрĕн çумĕ Ранис Алтынбаев Чăваш халăх поэчĕ Ухсай Яккăвĕ ниçта та мар, Пушкăртстанра çуралса ӳснишĕн хĕпĕртенине, унпа республика тивĕçлипе мухтаннине пĕлтерчĕ.


Хыпар çăлкуçĕ: http://gov.cap.ru/chuv/news.as...83-494d-95eb-7eb4575c9e35