Тутарстанăн Элкел районĕнчи Çĕньялта çак районти чăваш чĕлхипе литература вĕрентекенĕсем пухăнса канашларĕç. Кунти шкул ĕçченĕсем уçă уроксем ирттерчĕç, вырăнти çурт-музейре чăваш туйĕн инсценировкине кăтартрĕç. Кĕске вăхăт хушшинче ял варринчи кивĕ медпунктран çĕньялсем ĕлĕкхи чăваш музейне туса лартнă. Унта йăлтах ĕлĕкхи пурнăçла тунă: кăмаки те пур, арчи те, кĕнчелипе ал арманĕ те çенĕкре, чӳрече янаххисене те эрешлисемпе улăштарма хатĕрленеççĕ. Ачасем туй йăлисене лайăх вĕренни сисĕнчĕ: ятарлă юрăсене те, такмаксене те ăста юрларĕç. Ташши тата мĕне тăрать! Çакă йăлтах кивĕлле капăрлатнă кил-çуртра пулса иртнине шута илсен хăвна ху шăпах ĕлĕкхи пек, туй ĕçкине кăмака хыçĕнчен пăхса тăракан евĕр туятăн. 
Тĕлĕнтерчĕç элкелсем. Ку тăрăхри чăвашсем вĕт иртнĕ çулсенче, Сиктĕрмери музей ĕçĕ-хĕлĕпе Çĕньялти Уява шута илмесен, тăван чĕлхепе культурăна аталантарас ĕçре ытла палăрмастчĕç. Хальхи чăваш чĕлхипе литература вĕрентекенĕсен методика пĕрлешĕвĕ пирки çакна калаймастăн. Хастарсем темелле вĕсене. Çулсене пылчăк тухма пуçланине пăхмасăрах пурте пуçтарăннă канашлăва. Учительсен пĕрлешĕвĕ вĕренекенсен «Ман юратнă учитель» темăпа çырнă сочиненийĕсене пăхса тухса хакларĕç. Хаçат ĕçченĕсемпе ирттернĕ тĕлпулура та çивĕч ыйтусене сӳтсе яврĕç. Тĕслĕхрен, хăш-пĕр ялсенче ашшĕ-амăшĕсем ачисене заявлени çырсах чăваш чĕлхипе литература урокĕсене ярасшăн мар. Сăлтавĕ имĕш, нагрузка пысăк пулнинче. Тăван чĕлхен 2 сехетне хирĕç вĕсем, çав вăхăтрах тутар чĕлхине эрнере 6 сехет вĕрентнине никам та хирĕç мар. Кулăшла ку. Тăван чĕлхе кирлĕ мар çынна мĕнле-ха ытти ют чĕлхесем килĕшчĕр?
ТР ЧНКА ĕçĕ-хĕлне те Элкел тăрăхĕнчи чăвашсемпе сӳтсе яврăмăр. Кунти шкулсенче вĕт 30 çула яхăн чăваш çырулăхĕ пулман, çавăнпа та хальхи вăхăтра ачисене шкула яракансем ытларах чухне шăпах чăвашла вĕренмен чăвашсем пулса тăраççĕ. Вĕсен кăмăлне çавăрма çăмăл мар, çапах та ĕçлемелле. Автономи чăвашсем йышлă пурăнакан районсенче пысăк мероприятисем, хуласенче концертсем ирттерни лайăх япала, анчах халăхшăн – усси сахалрах. Унти чăвашсем нумайран нихăçан та манса каймĕç хăйсем камсем пулнине. Чăвашсем сахал пурăнакан районсемпе ытларах ĕçлемелле, уйрăмах хутăш ялсенче. Вĕсенчи чăвашсене «вăратмалла», чăвашлăха аталантарма условисем тумалла. Ку ĕç вара юлашки çулсенче пачах путланса ларчĕ темелле. Асфальтсăр ялсене те çитесчĕ пирĕн, перепись çывхарать вĕт.
Эстрада çăлтăрĕсене чĕнтерсе чаплă концертсем ирттерни çителĕксĕр. Вăл чуна йăпатни тата ытти нацисем умĕнче хамăр халăхăн чапне çĕклени кăна. Имидж мероприятийĕ. Анчах çав концертсене çитес çулсенче çӳрекенсем, хаçат-журналсен пулас вулаканĕсем çинчен те манса каймалла мар, çине тăрсах чăвашла вĕрентмелле. Вĕрентесчĕ.