Фоторепортаж

Иртнĕ эрне кун Шупашкар тĕрлĕ регионта пурăнакан чи маттур, чи ăста, чи пултаруллă чăваш пикисене пуçтарчĕ. "Мега Галакси” кану центрĕнче "Раççей чăваш пики-2011” V конкурс иртрĕ. Икĕ çулта пĕрре пулакан конкурс халиччен Мускавра пулнă, Шупашкарта – пĕрремĕш хут. Унта Чăваш, Пушкăрт, Тутарстан Республикисен, Самар, Ульяновск облаçĕсен тата Мускав хулин пикисем хутшăнчĕç. 
Регионсенчен килнĕ делегаци ертÿçисем пĕлтернĕ тăрăх, çулсерен конкурса хутшăнма килĕшекенсене тупма йывăрланса пырать. Чăваш хĕрĕсем чăнласах хитре те пултаруллă, анчах тĕп условисенчен пĕри – конкурсантсен чăвашла ирĕклĕн калаçмалла. "Чăваш пики” илем конкурсĕ çеç мар, жюри сăн-пит, кĕлетке чиперлĕхне, сцена çинче хăйне мĕнле тытнине те хаклать ĕнтĕ, унсăр пуçне пултарулăхне те, чăваш йăли-йĕркине пĕлнине те шута илет. 
Хĕрсем чылай вăхăт хатĕрленни куç кĕрет: акă пултарулăх конкурсĕ валли хăшĕ-пĕри клип та ÿкернĕ, визиткăна та слайд-шоу евĕр тума мехел çитернĕ, апат-çимĕçне те янтăланă, чăваш тĕрриллĕ кĕписем те пĕринчен тепри хитре. Сăмах май, республика тулашĕнче пурăнакансен вĕсене çĕлеттерме ятарласа Шупашкара килнĕ. "Раççей чăваш пики-2011” ята Чĕмпĕртен килнĕ Елена Васильева çĕнсе илчĕ, ытти хĕрсене те тĕрлĕ номинацире палăртса парнесемпе хавхалантарчĕç. 
Конкурс вĕçленчĕ: юрас тесе вăл пĕр самант пек иртсе кайрĕ темеллеччĕ пулĕ те... Тăватă сехете яхăн тăсăлсан кирек мĕнле уяв та хăй сĕтеклĕхне çухатать çав. Хĕрсене курма, танлаштарма, хаклама вăхăт çителĕклех пулчĕ темелле, анчах темиçе сехет сцена çине куç илмесĕр пăхса лартăм пулин те пĕрне те уйрăммăн палăртаймарăм. Хам тимсĕр пултăм пулинех. Çапах та конкурссем ытла та "сăнсăр” пулчĕç пек туйăнать. Урамра: "Эсĕ мĕнле чăваш апатне пĕлетĕн?” – тесе ыйтсан иккĕленместĕп, çурри хуплăва тата шăрттана асăнĕ. Хĕрсем те пурте тенĕ пекех шăп вĕсене пĕçерсе килнĕ. Чăн та, пирĕн асанне-кукамай пĕçернĕ апатсем манăçма ĕлкĕрчĕç пуль çав. Анчах конкурса шăпах авалхи йăла-йĕр- кене манăçма парас мар тесе ирттереççĕ-çке! Пикесем ĕлĕкхи рецептсене шыраса тупнă пулсан куракансене те, жюри членĕсене те чылай интереслĕрех пулĕччĕ. 
Конкурса пач та улшăну кĕртмен теме çук-ха. Акă, пикесен ăс-тăнне унччен чăваш писателĕ-поэчĕсене, авалхи ĕç хатĕрĕсене пĕлнине кура хаклатчĕç пулсан, хальхинче вĕсене "чăваш”, "халăх” тата "Атăл” сăмахсемпе усă курса сăвă е калав çырма сĕнчĕç. Паллах, кашниех тăван халăхĕпе мăнаçланнине, хăй чăваш пулнишĕн хĕпĕртенине палăртма васкарĕ. Раснарах сăмахсем пулнă тăк, ахăртнех, калав-сăвви те кăткăсрах пулĕччĕ. 
Чăваш пикисем – уяв илемĕ пулчĕç тĕк, спонсорсем – хуçисем. Хăшĕ-пĕри сцена çине тухса юрă шăрантарма та ÿркенсе тăмарĕ, ыттисем вара жюри сĕтелĕ хушшинче вырăн тупрĕç. Вĕсен хаклавĕ пĕртте иккĕлентермест, çапах та пултарулăх конкурсне ку енĕпе ĕçлекен ăстасем хак парсан вырăнлăрах пулĕччĕ пуль. Пикесене хăйсен парнисене панă чухне жюри-спонсорсем вырăсла калаçрĕç те хĕрсен чăвашла пуплевне куçарса паракансем пулнă-ши; "Спорт-пике” номинацие пĕлтерсен ман кÿршĕ чăтаймарĕ: "Вĕсем чупрĕç те-им?” – тесе хушса хучĕ. Номинаци спонсорĕ спорт фирми иккен. Ун хыççăнах строительство фирми хăй пикине палăртрĕ. Ăна мĕне кура палăртнине асăнмарĕç пулин те "строитель-пике” ят паманниех савăнтарчĕ. 
Вырăссем "Çĕнтерни мар, хутшăнни паха” теççĕ. "Чăваш пикин” тĕп шăнăрĕ те çакăнта пулмалла пек, тĕп вырăна ăмăрту мар, чăваш йăли-йĕркине, пултарулăх туприне, юрри-кĕввине кăтартасси мала тухмалла.

Надежда ЯКОВЛЕВА.