2012 çулхи чÿкĕн 24-мĕшĕнче ЧР Наци вулавăшĕнче Чăваш халăх академийĕн черетлĕ çулталăк пухăвĕ пуçтарăнать. Унта Халăх хуралĕ /Народный фронт/, Ваттисен канашĕ /Совет старейшин/, Ял мухтарĕсен пуххи /Сход сельских старост/, Ентешлĕхсен канашĕ /Совет чувашских землячеств/ тата ытти элтешлĕх пĕрлĕхĕсем /гражданские объединения/ ĕç-хĕлĕ пирки сăмах пулатех.
Чăваш халăх хуралĕн тĕп ĕçтăвкомĕн ертÿçин Д.В.Гордеевăн шухăшĕпе - вырăнти Ваттисен канашĕсемпе, старостăсемпе, ентешлĕхсемпе, союзсемпе, партисемпе, хунтăсемпе ĕçлеме йĕркеленĕ Халăх хуралĕ /Народный фронт/ кирлĕ мар, мĕншĕн тесен вăл ĕçлемест. Йăлтах ЧНК çумĕнчи Ваттисен канашĕпе пĕрлештермелле-мĕн. Çĕр-шывра граждан обществи тăвас тесе тапаçланнă вăхăтра общество пĕрлешĕвĕсене пĕтерес тесе мар, вĕсене йĕркеллĕ ĕçлеттерсе ярас тесе шухăшламалла. Халăх хуралĕ /Народный фронт/ 1988 çулта чăмăртанчĕ, Политпросвет çуртĕнчи «Тĕпел» /Трибуна/ урлă самай витĕмлĕ ĕçсем туса ирттерчĕ. Ун чухне Халăх хуралĕн положенийĕ пичетре тухаймарĕ, 2001 çулта тин /«Тăван Атăл», 11// Ваттисен хуралĕпе Ял мухтарĕсем çинчен каланисем пичетленчĕç. Н.В.Федоров Президентпа М.А.Михайловский Председатель Ял мухтарĕсемпе Ваттисен канашĕсене шута хумарĕç /эпĕ вĕсемпе ку ыйтупа ЧНК съездĕнче калаçнăччĕ. «Тăван Атăл» кăларăмне панăччĕ/. Патшалăх шута хуман пулсан та Ваттисен канашĕсемпе старостăсем нумай-нумай ялта чиперех ĕçлеççĕ. Ентешлĕхсем те саланса каймарĕç. Фондсем те /К.В.Иванов, Çеçпĕл, Сувар хунтисем/ ырăпа палăрчĕç. Эппин, вĕсем кирлĕ, вĕсен пурнăçри вырăнĕ пур. Тăван халăх ывăлĕсем тетпĕр пулсан, пирĕн хамăра шанса панă ĕçре сÿрĕк пулма тивĕç çук.
Паллах, ун чухнехи палăртусенчен чылайăшĕ пурнăçланнă, теприсем кивелнĕ. Унтанпа пысăк улшăнусем пулса иртрĕç. Республика ертÿлĕхĕ тĕпрен улшăнчĕ. Кирлĕ те татăклă ĕçсем тăвайман тĕрлĕ ушкăнсем «Эпир чăваш мар, эпир - сувар!» тата вĕсене хирĕç тепĕр ушкăн «Эпир чăваш мар - эпир пулкар!» теме пуçларĕç. Чăваш Республики вырăнне «Атăлçи Пăлхар» тесе йышăнма хистекенсем пур. Капла пăтранма пуçласан Жириновскипе Прохоров капиталистсем хыççăн «Тавай пире Чебоксарски уес!» тесе кăшкăрмалли çеç юлать. Халăха шалтан пайлама шутлани ăнсăртран сиксе тухнă пулăм мар.
Хальхи лару-тăрăва сÿтсе явса нацин чăмăртану ĕçне тата лайăхрах çул çине тăратмалла, тĕлсĕр турткаланса каймалла мар тесе шухăшлатăп.
ЧР Пуçлăхĕ М.В.Игнатьев Общество палати турĕ. Вăл палата мĕн хапăллине тата халăх хушшинче мĕн ĕçленине пĕлместĕп. Влаç çумĕнче палата пурри е большевиксем урамра ялавпа çÿрени чăваш хура халăхĕн нуши пĕтнине, Халăх хуралĕ кирлĕ мар тенине пĕлтермест.
Эпĕ сире Чăваш халăх ăс-хакăлĕпе ÿнерĕсен серепĕн /Чувашская народная академия наук и искусств/ çулталăк пухăвĕнче хăвăрăн шухăшăра калама ыйтнă пулăттăм. Пĕр чĕлхе тупса канашлаятпăр пулсан Халăх хуралĕн, Ваттисен канашĕсен, ентешлĕхсен, культура автономийĕсен, тĕрлĕ партипе фондăн çыхăнуллă тытăмне чăмăртама пултаракан йĕрке тупăнассăн туйăнать. Вара ăна ЧНК черетлĕ Аслă пухăвĕнче çирĕплетсе хăварма, пысăк ĕçсен планне патшалăх органĕсен умне тăратма май пулĕччĕ.

Çăлкуç: http://hypar.ru/nws/show/32/17604/index.php?id=s221616445572