Чăваш наци конгресĕ 2016-мĕш çулхи кăрлачăн 20 - мĕшĕнче "Хальхи тапхăрта чăваш чĕлхипе культурине упраса хăварасси тата аталантарасси: çивĕч ыйтусем тата малашлăх" темăпа çавра сĕтел ирттерчĕ. Унта ЧНК Президенчĕ Николай Угаслов, унăн çумĕсем Валерий Клементьевпа Петр Ивантаев, конгресс ĕç тăвакан комитет тата вĕренÿпе ăслăлăх комитечĕн председателĕ Геронтий Никифоров, Президиум пайташĕ тата вĕренÿпе ăслăлăх комитечĕн пайташĕ Юлия Анисимова, аслă шкулсен чăваш чĕлхин ăстаçисем, Ваттисен Канашĕн пайташĕсем хутшăнчĕç. Малтанах сăмах Николай Угаслов илчĕ. Вăл пухăннисене çавра сĕтелте чăваш чĕлхипе тата культурипе çыхăннă ыйтусене тĕплĕн сÿтсе явма, тăван чĕлхене аталантарма май паракан пулăмсене палăртса республика пуçлăхĕ умĕнче тăратма хатĕрленме ыйтрĕ. Президент хыççăн çавра сĕтелте ЧНК Ваттисен Канашĕн председателĕ Василий Шадриков сăмах илчĕ. Вăл уйрăмах республикăра наци кадрĕсене хатĕрлес ыйту çивĕч тăнине палăртрĕ.

Чăваш чĕлхин ăстаçисем паянхи кун чăваш чĕлхи шăпи çинчен пăшăрханса калаçрĕç. "Çÿлтисем пире итлеççĕ, анчах илтмеççĕ", - терĕ И.Я.Яковлев ячĕллĕ ЧППУ доценчĕ Тамара Артьемьева. -- Республикăмăрта «Чăваш Республикинчи чĕлхесем çинчен» калакан саккунпа килĕшÿллĕн чăваш чĕлхи вырăс чĕлхипе танах патшалăх чĕлхи пулнă май, ăна хисеплесси учрежденисен ертÿçисенчен нумай килет- терĕ вăл. Тамара Васильевна чĕлхене аталантарма ăслăлăх лаборатори туса хума сĕнчĕ. "Ăнăçулăх тĕнчи" ют çĕр-шыв чĕлхисен шкулĕн ертÿçи Александр Блинов хулара чăваш чĕлхине вĕрентмелли кăсăклă меслетсемпе майсем тумаллине, шкул ачисене паянхи куна тивĕçтерекен кăсăк кĕнекесем кирлине каларĕ, ачасемпе килте ашшĕ-амăшĕн чăвашла калаçмалли пирки палăртса хăварчĕ.

ЧР вĕренÿ институчĕн чăваш чĕлхипе литературин кафедрин пуçлăхĕ Анна Егорова доцент, çак институтри Наципе вĕренÿ центрĕн пуçлăхĕ Ирина Алексеева, Юрий Виноградов доцент тата ытти специалистсем чăваш чĕлхин пĕлтерĕшне, ун кирлĕлĕхне ÿстересси тата талккăшне сарасси пирки хăйсем мĕн шутланине пĕлтерчĕç. Çавра сĕтелте калаçăва хутшăнса Ваттисен Канашĕн пайташĕсенчен кашниех чăваш чĕлхине упраса хăварасси пирки хăйĕн шухăшне пĕлтерчĕ.

Çитес вăхăтрах кунта каланă шухăшсене пĕтĕмлетсе «Чăваш Республикинчи чĕлхесем çинчен» калакан саккуна пурнăçа кĕртекен яваплă министерствосен ертÿçисемпе тĕл пулса калаçма килĕшсе татăлчĕç.

ЧНК пресс-службин ертÿçи Зоя Яковлева.