Чăваш чĕлхи кунĕ тĕлне — Чăваш халăх сайчĕ, Тĕнче тетелĕнчи «Сăвар ТВ» каналпа «Шкул ТВ» канал, Чăваш чĕлхин инçет вĕренӳ центрĕ — çĕнĕ конкурс пуçарать! Вăл «Чăваш ачи, сассуна пар!» ятлă пулĕ!
Видеосăвăсен ăмăртăвне хуть те хăш ӳсĕмрисем хутшăнма пултараççĕ: ачасем та, çамрăксем те, çитĕннисем те, тивĕçлĕ канăва тухнисем те. Видеокамера умĕнче сирĕн чăваш чĕлхине халалланă, чăваш чĕлхипе çыхăннă сăвва вуламалла çеç. Хальхи вăхăтра видео ӳкерекен хатĕрсем чылай пулнине шута илсен — смартфонпа та, видеокамерăпа та, ахаль телефонпа та тума пулать — ку сирĕншĕн йывăрлăх пулмĕ тесе шутлатпăр. Видеосăвăсене эпир вулав ăсталăхĕ, видео пахалăхĕ тата фон пахалăхĕ тăрăх 1–10 балл парса хаклăпăр. Хаклакансен йышĕнче «Сăвар ТВ» ĕçченĕсем, Надежда Кириллова артистка тата ыттисем пулĕç.
Сăвă вуланă видеона сирĕн пĕр-пĕр видеохостинга хăвсамăрăн вырнаçтармалла пулĕ, пире, ăмăртăва йĕркелекенсене, çав видео каçмине кăна ярса памалла. Йывăрлăхсем пулсан civmih2@narod.ru адреспа ярса пама пулать — Владимир Андреев сирĕн видеона «Шкул ТВ» телеканалта вырнаçтарĕ.
Сирĕн ĕçсене акан 15-мĕшĕччен йышăнатпăр. Каçăсене videosava@chuvash.org адреспа ярса памалла. Тĕплĕнрех ăмăртăвăн йĕрки-шывĕнче пĕлме пулать. Чи лайăх вулакансене, тен, Чăваш наци телекуравĕпе (кун пирки Александр Магаринпа калаçса) Чăваш чĕлхе кунĕнче кăтартĕç. Çавăн пекех «Сăвар ТВ» тата «Шкул ТВ» каналсенче вырнаçтарăпăр. Унсăр пуçне, паллах, çĕнтерӳçĕсене Хисеп хучĕсемпе, ыттисене ăмăртăва хутшăннине ĕнентерекен хутсемпе тивĕçтереççĕ.