Нарăсăн 9-мĕшĕнче, «Ăраскал çăлтăрĕ» литература ăмăртăвĕнче мала тухнă ачасемпе вĕрентекенсене парнесемпе тата хисеп хучĕсемпе чысларĕç. Мероприяти хальхинче Красноармейски шкулĕнче иртрĕ.

Çĕнтерӳçĕсене картинсемпе (пĕрремĕш вырăна тухнисене — 60х40 калăпăшлă ӳкерчĕк, ыттисене — 30х20 калăпăшлине), кĕнекесемпе (эпир кăларнă «Урхамахсем тăраç тапăртатса» тата халăх сăмахлăхĕн «Янавар юмахĕсем» кĕнекипе), календарьсемпе (кĕсье календарĕ тата А. Розов юбилейĕпе кăларнă стена календарĕ), «Пукане» ятлă караоке дискпа наградăларĕç. Паллах, конкурса хутшăнакансене хисеп хучĕсемпе (мала тухнисене) тата ĕнентерӳ хучĕсемпе (ыттисене) те чысларĕç.

Чăваш халăх сайчĕн тĕп администраторĕ Николай Плотников конкурса çĕнтернĕ тата ăнăçлă пулса тухнă хайлавсене пĕр çĕре пухса кĕнекен калăпласа кăларма шантарчĕ. 

Уява пухăннисем кăçал та çак конкурса ирттерме йышăнчĕç. Ăна "Чăваш йăмри" тĕп темăна халаллас терĕç. Кунсăр пуçне хушма тема та пулма пултарать.

Юрă тăхтавĕсенче хăйсен пултарулăхĕпе «Юрату.ру» ушкăн (ертӳçи: Роза Беляева) хĕрĕсем савăнтарчĕç.

Чыслава çитейменнисене пĕлме: хисеп хучĕсене электронлă вариантпа тивĕçтерĕпĕр (amartu@chuvash.org адреспа çыру çырăр), ĕнентерӳ хучĕсене вара Чăваш республикин вĕренӳ институтĕнче илме май пулĕ. Парнесене илес тесен те çӳлерех асăннă адреспа çырса ыйтмалла.