Чăваш халăх сайчĕпе Чăваш чĕлхин инçет вĕрентӳ центрĕ шкул ачисене тепĕр ăмартăва хутшăнма йыхравлать. Хальхинче вĕсем комикссен конкурсне йĕркелес терĕç, ăна «Çăлтăр çути» ят панă.
Çак ăмăртăва пуçарса ачасемпе çамрăксен ӳнер пултарулăхне аталантарас, ушкăнпа ĕçлеме хăнăхтарас тата çутçанталăкпа тăван тавралăх пулăмĕсене ӳкерчĕк мелĕпе уçса пама вĕрентес тĕллев лартасшăн.
Конкурса 18 çула çитмен çамрăксемпе ачасем хутшăнма пултараççĕ. Пĕр ĕçе темиçен пĕрлешĕнсе тума та юрать: пĕри, сăмахран, сюжет хатĕрлет, тепри — хитре ӳкерет, виççĕмĕшĕ калаçу сăмахĕсене йĕркелет.
Сюжет çăлтăрпа çыхăнмалла. Комикс сюжетне уçса пама 2 листаран (кашни А4 пысăкăш) кая мар усă курмалла. Хут листин пĕр енĕ таса юлмалла. Ĕçе хатĕрленĕ май хуть те мĕнле техникăпа усă курма юрать —кăранташ, калем, фломастер, гуашь, пастель, кăмрăк кăранташĕ т. ыт.