Тутарстан IELTS, TestDaf тата Dele пĕтĕм тĕнчери чĕлхе экзаменĕсем евĕр тутар чĕлхине мĕнле шайра пĕлнине палăртакан пĕтĕм тĕнчери сертификаци тытăмне кĕртет. Малтанлăха палăртнă тăрăх, ку тестсене 2015 çулта 9-мĕш класран вĕренсе тухакансем тытĕç, темиçе çултан — Тутарстанри аслă шкулсен студенчĕсем. ТР Вĕренӳ министерстви сертификатсене малашне ĕç паракансем те хакласса шанаççĕ.

Чĕлхе сертификаци центрне тумашкăн контракт алă пусмалла. ТР Вĕренӳ министерстви кун пирки юпан 16-мĕшĕнче пĕлтернĕ. Техника заданийĕпе килĕшӳллĕн, центра тăвакан организаци çулталăк вĕçĕччен ытти çĕршыври сертификаци центрĕсене пăхса тухмалла, Раççей тата ют çĕршыв эксперчĕсемпе канашламалла тата тестсене хатĕрлеме тытăнмалла. Чĕлхе сертификацине тытмалли аудитори 30 тăваткал метртан пĕчĕк пулмалла мар. Унта 26 çынран кая мар кĕмелле.

Сертификаци центрне 2014 çул вĕçне уçма палăртнă. Тестсене тĕрлĕ шайра вĕренекенсем валли хатĕрлĕç. Вĕсене Кембриджри пек хатĕрлеме палăртнă. Унтан центр вĕсене Кембриджри университет çумĕнчи ALTE пĕтĕм тĕнчери ассоциацине ярĕ. Кун хыççăн сертификаци тĕнче стандарчĕ пек пулĕ. Çапла майпа унпа Тутарстанри вĕренӳ заведенийĕсенче усă курма май пулĕ.

2015 çулта теста 9-мĕш класран вĕренсе тухакансем тытĕç. Вĕсене аттестатпа пĕрле тутар чĕлхине мĕнле шайра пĕлнине кăтартакан сертификат парĕç. Вырăс ушкăнĕнче вĕренекенсем, чăвашсем, удмуртсем чи çăмăл теста тытĕç. Тутарстанри ятарлă шкулсенче чи йывăр теста пурнăçлĕç.

Малтанлăха палăртнă тăрăх, тестсем тӳлевсĕр пулĕç. Çакна пурнăçлама Тутарстан 2 миллион тенкĕ уйăрнă. Тест валли çулсерен 1 миллион тенкĕ пăхса хурĕç.

Медицина унивеситетĕнче тутар чĕлхине професси хутшăнăвĕ валли вĕрентеççĕ. Аслисем студентсене литература чĕлхипе яка калаçма вĕренме хĕтĕртмеççĕ. Анчах кашниех кĕлеткен пайĕсен ячĕсене тутарла пĕлмелле-мĕн.

Çăлкуç: http://www.chuvash.org/news/7312.html