Чăваш халăх сайчĕ пĕлтерет: Иртнĕ уйăхра «Раççей — спорт çĕршывĕ» спорт канашлăвĕ иртнĕ май тĕп хуламăрта чарăну вырăнĕсене çĕнетсе тухрĕç. Питĕ васкарĕç курăнать — чарăнусене чăвашла ятсемсĕр хăварчĕç, вырăслисенче йăнăшсем тукаларĕç. Хайхи вырăсла çырнисенчи йăнăшсене хăвăрт юсаса тухрĕç пулсан, чарăну ячĕсем чăвашла самай вăхăт иртсен те хăй вырăнне йышăнаймарĕ.

Паянхи куна илес пулсан пире савăнмалли, тӳре-шарана мухтамалли сăлтав пурах. Тинех Шупашкарти чарăну ячĕсем — вырăсла та, чăвашла та. Эпир хамăр ку лайăх пулăма хулан тĕп урамĕсенче — Ленин проспекчĕпе Карл Маркс урамĕнче асархарăмăр. Ĕç-пуç ытти урамсенче те çавнашкалах пуль тетпĕр.

Сăмах май, раштавăн 4-мĕшĕнче Чăваш чĕлхи комиссийĕн 2014 çулти иккĕмĕш ларăвĕ иртмелле. Пĕрремĕш ыйтура унта муниципалитет йĕркеленĕвĕсен — Шупашкар хулин тата Патăрьел районĕн — администрацийĕсем Чăваш Республикин «Чăваш Республикинчи чĕлхесем çинчен» калакан саккунне мĕнле пурнăçласа пыни çинчен калаçмалла. Шăп та шай çавăн тĕлне вырнаçтарса тухнă та пулинех хула администрацийĕ. Çавах мухтас пулать — чăвашла ятсенче йăнăшсем курмарăмăр.

Çăлкуç: http://www.chuvash.org/news/7633.html