Трак енри шкулсенче ĕçлекен чăваш чĕлхи вĕрентекенсен методика пĕрлешĕвĕ йышăннă  планпа килĕшỹллĕн, чỹк уйăхĕн 16-мĕшĕнче Трак вăтам шкулĕнче чăваш чĕлхипе литературине вĕрентекенсен районти методика пĕрлешĕвĕн иккĕмĕш ларăвĕ иртрĕ. Палăртса хăвармалла, методика пĕрлешĕвĕн ĕçне иртнĕ вĕренỹ çулĕнчен Пикшик шкулĕнче тăван чĕлхепе литературине вĕрентекен, аслă категориллĕ учитель Людмила Анатольевна Тихонова ертсе пырать. Ларăва тăван районти шкулсенчен çеç мар, кỹршĕллĕ Çĕрпỹ районĕнчи чăваш чĕлхипе литературине вĕрентекен учительсем те хутшăнчĕç. Пĕрле пуçтарăнса “Шкул ачисен проект ĕçĕ-хĕлĕнче этнопедагогикăна воспитани хатĕрĕ пек усă курасси” темăна сỹтсе яврĕç. Шкулсенче халăх педагогикине тĕпе хурса ĕçлесе пыракан пултаруллă та мал ĕмĕтлĕ учительсем сăмах илчĕç. Хăйсен опычĕпе паллаштаракансен йышĕнче Юлия Егоровна Кузьминапа Ираида Николаевна Антонова (Трак вăтам шкулĕ) тата Светлана Валерьевна Петровăпа Вера Вениаминовна Васильева (Упи вăтам шкулĕ) пулчĕç. Ларăвăн иккĕмĕш пайĕнче Трак ен тата Çĕрпỹ районĕсен вĕрентекенĕсем “Этнопедагогика тата çĕнĕ стандарт килĕшсе тăраççĕ-и е çук?” ыйту тавра методика кĕперĕ йĕркелерĕç, ыйту-хурав мелĕпе ĕçлесе пĕр-пĕрин пĕлĕвне ỹстерчĕç, этнопедагогика çĕнĕ стандартпа килĕшсе тăтăр тесен шкул ачисене асăннă темăпа проект ĕçĕсем çыртарни вырăнлă пулнине пĕ-тĕмлетсе хăварчĕç. Лару хыççăн икĕ район вĕрентекенĕсем Трак вăтам шкулĕнче вăй хуракан учительсем хатĕрленĕ кăмăл урокĕсенче пулчĕç. Раççей вĕренỹ академийĕн академикĕ Г.Н. Волков çуралнăранпа 90 çул çитнине халалланă уява хутшăнни те кашнин асĕнче ырă аса илỹсемпе тăрса юлчĕ. Вĕрентекенсемшĕн çак кун тухăçлă иртрĕ. Тăван халăхăмăрăн тăван чĕлхипе литературине вĕрентекенсем Трак вăтам шкул администрацийĕпе учителĕсене, шкул ачисене асăннă куна çỹллĕ шайра ирттерме пултарнăшăн, туйăмсен авăрĕнче чуна тăванла чỹхентернĕшĕн, чăваш йăли-йĕркине пăхăнса хăйсене хисеп тунăшăн çĕре çити пуç таятпăр.

И. Козлова.