Паян, пушăн 15-мĕшĕнче, Чăваш халăх çыравçи Лаврентий Таллеров çут тĕнчерен уйрăлса кайнă.
Сывпуллашу вырсарникун Шупашкарти Граждансен урамĕнчи 19 çуртра («Ритуальные услуги» МУП) 14-15 сехетсенче пулĕ.
Таллеров Лаврентий Васильевич 1929 çулхи кăрлачăн 27-мĕшĕнче Нĕркеç ялĕнче (Комсомольски районĕ) çуралса ӳснĕ. 1976 çултанпа СССР çыравçăсен пĕрлешĕвĕн пайташĕ. Чăваш халăх çыравçи (1988), Чăваш Республикин тава тивĕçлĕ культура ĕçченĕ (1981). Чăваш театрĕсенче вылякан тата ĕçлекен артистсемпе режиссерсен пултарулăхне тăтăш çутатса тăнишĕн ăна Çемен Элкер ячĕллĕ премине панă.
Лаврентий Васильевич Çĕнĕ Кипеçри вăтам шкулта вĕреннĕ. Ӗçленĕ хушăрах Елабугăри (Тутарстан) библиотека техникумне пĕтернĕ. Нумай çул хушши районти «Октябрь ялавĕ» хаçат редакторĕ пулнă. 1969 çулта Шупашкара куçса килнĕ. Вунă çула яхăн «Коммунизм ялавĕ» хаçат редакцийĕн культура, литературăпа ӳнер пайне ертсе пынă. Унтан «Тăван Атăл» редакцине ĕçлеме куçнă, явăплă секретарь, тĕп редактор çумĕ пулнă, 1985-1989 çулсенче тĕп редакторта ĕçленĕ.
Паллă кĕнекисем: «Хурăн шывĕ» (1975), «Култарам-ха арăмран» (1977), «Юхать юханшыв» (1978), «Сăпка юррисем» (1979), «Çăлтăр витĕр çул курăнать» (1983), «Хĕвел çаврăнăш — ылтăн çӳç» (1986), «Эрхип мăнукĕ Эрхип» (1992), «Йĕркеллĕ çын асапĕсем», «Шеремет» тата ыттисем.
Çыпăçтарнисем: |
