Кăрлач уйăхĕн 17-мĕшĕнче Чăваш наци библиотекин "Чăваш кĕнеки" вулав пÿлĕмĕнче пирĕн сумлă ентешĕн тата Чăваш халăх поэчĕн Юрий Сементерĕн поэзи каçĕ иртрĕ. Унта Вĕренÿ институтĕнче пĕлĕвне ÿстерекен чăваш чĕлхи учителĕсем (çав шутра çак йĕркесен авторĕ те), Чăваш ялхуçалăх академийĕн студенчĕсем, Шупашкарти ентешлĕх тата тĕрлĕ ÿнер çыннисем хутшăнчĕç. 
Уяв каçĕнче сăвăçă хăй сăввисене вуласа пачĕ. Пĕрремĕш сăвва вара вăл шкулта чăваш чĕлхи вĕрентекенсене халалларĕ. Ун хыççăнхи сăввине - хăйшĕн пурнăç тĕслĕхĕ пулса тăнă Петĕр Хусанкая. Хусанкайпа чи малтан тата ĕçе пула тĕл пулнă самантсене те аса илчĕ поэт.
Кунсăр пуçне çыравçă Филипп Лукинпа килĕштерсе ĕçлени, унпа пĕрле халăхра анлă сарăлнă юрăсем çырни çинчен каласа кăтартрĕ. Уйрăмах "Уçланкăри палан" юрă кун-çулĕ çинчен каласа пани кăсăклă пулчĕ пухăннисене.
Наци вулавăшĕн ĕçченĕсем поэзи каçĕ тĕлне пысăк парне хатĕрленĕ. Вĕсем Ю.С.Семенов - Сементер поэтăн пурнăçĕпе пултарулăхне халалланă "Чунра хӗмленнӗ йӗркесем" электронлă кăларăм пуçтарнă. Унта "Кун-çулăм", "Литература пултарулăхĕ", "Пурнăçăм тата ĕçĕм", "Пурнăç саманчĕсен фотогалерейи" тата "Библиографи" пайсене вырнаçтарнă. Мультимеди кăларăмне кунсăр пуçне 71 сăвă тексчĕ (вырăсла тата чăвашла), поэтăн сăввисемпе çырнă 25 юррăн кĕвĕ файлĕ кĕнĕ.
Вулавăш ĕçченĕсем поэзи каçĕ тĕлне поэтăн вулавăшра упранакан кĕнекисен выставкине йĕркеленĕ.
Пухăннисем тата тухса калаçакансем поэта ырлăх-сывлăх сунчĕç, малашне те поэзи анинче çĕнĕ шедеврсем çураласса шаннине палăртрĕç.
Малашнехи ĕç планĕпе те паллаштарчĕ çыравçă. Халĕ вăл тутар поэзийĕн анталогине (унта 71 тутар поэчĕн пултарулăхĕ кĕрет) чăвашла куçарассипе тимлет иккен. Юлашкинчен поэт хăй сăмахне çапла вĕçлерĕ: "Чăваш чĕлхине пĕтме парар мар...". Çапла пултăрах, чăвашсем калашле.