И.Н. Ульянов ячĕллĕ Чăваш патшалăх университечĕн историпе географи факультетĕнче иртнĕ эрнекун чăвашла çырнă диплом хӳтĕлевĕ иртнĕ. Чăвашра пурăнатпăр пулин те ку хыпара хăшĕсем темĕнле пысăк ĕç тунăн йышăнни вăрттăнлăх мар. Ара, унччен апла туман та, тĕлĕнтермĕш евĕрех туйăнать пуль çав… Вырăс, чăваш чĕлхисен тата журналистикăн факультечĕсенече чăвашла çыраççĕ-ха. Анчах историпе географи факультетĕнче халиччен ун пекки пулман.

Диплома чăвашла çыраканĕ — Дмитрий Степанов ятлă студент. Диплома вăл «Чăваш наци конгресĕ: кун-çулĕ, паянхи лару-тăрăвĕ тата пуласлăхĕ» темăпа çырнă.

Студент диплома чăвашла çырнă чух хăш-пĕр йывăрлăхпа тĕл пулнине пытарман. «Хальхи вăхăтра чăваш чĕлхин ăслăлăх чĕлхи пттех аталанман, — тенĕ вăл. — Хам пĕлекен çĕнĕ сăмахсемпе усă курма тиврĕ. Сăмахран, пайташ (член), элчĕ (представитель), элтеш (гражданин)».

Диплома пиллĕклĕх хӳтĕлеме пултарнăшăн вăл питĕ савăннă. Май пулсан Степанов хăйĕн темипе кĕнеке те кăларасшăн.

Диплом çырнă чух каччă чăваш наци юхăмĕнче паллă вырăн йышăннă çынсемпе тĕл пулса калаçнă, вĕсенчен интервью илнĕ. Çавсен шутĕнче Чăваш наци конгресĕн пĕрремĕш президенчĕ Атнер Хусанкай, Чăваш наци аталанăвĕн партийĕн ертӳçи пулнă Николай Лукианов, Виталий Станьял филолог тата ыттисем асăнма юрать. Атнер Хусанкай диплом ĕçне рецензи çырса хак панă. Ĕçе хӳтĕленĕ çĕре Чăваш Енри пĕртен-пĕр культурологи докторĕ Владимир Васильев тухса калаçнă. Вăл чăвашла диплом çырни историпе георграфипе факультетĕнче пĕрремĕш хут тĕл пулнине, ырă йăла иксĕлмессе шаннине палăртса хăварнă.

Çăлкуç: http://chuvash.org/news/6190.html