2015 çулхи раштавăн 17-мĕшĕнче ЧНКн вĕренÿпе ăслăлăх комитечĕн черетлĕ ларăвĕ иртрĕ.Ăна конгресăн Президенчĕн пĕрремĕш çумĕ Валерий Клементьев уçрĕ. Вăл Чăваш наци конгресĕн вун икĕ комитечĕн йышĕнче Вĕренÿпе ăслăлăх комитечĕ чи лайăххисен шутĕнче пулнине палăртрĕ.

Уйрăмах Геронтий Лукиянович Никифоров тата Юлия Елисеевна Анисимова яваплăха туйса тăрăшса вăй хунине асăнчĕ. Çак пархатарлă ĕçсемшĕн маларах асăннă комитет пайташĕсем ЧР Культура министерствин Хисеп хучĕсене илме тивĕçлĕ пулчĕç. Валерий Клементьев комитета çĕнĕ йышпа 2016-мĕш çулта татах та пуçаруллăрах ĕçлеме сĕнчĕ.

Комитет ĕçтешĕсем Раççейре Литература, Чăваш Енре К.В.Иванов çулталăкĕнче туса ирттернĕ ĕçсене пăхса тухса хак пачĕç.

Геронтий Никифоров чи курăмлă ĕçсенчен ЧР тата Раççей Федерацийĕн регионĕсенче 8-11 классенче вĕренекенсен хушшинче çамрăк çыравçăсен "Çĕнĕ ятсем уçатпăр" пултарулăх конкурсĕ лайăх ирттнине, çĕр те утмăл пилĕк ачаран çĕнĕ ятсем тупнине палăртрĕ.

2016 çулта Чăваш наци конгресĕ ЧР Вĕренÿ тата çамрăксен политикин министерствипе пĕрле Ĕç çынни çулталăкне халалланă 8-11-мĕш классенче вĕренекенсен хушшинче çамрăк чăваш çыравçисемпе ÿнерçисен "Çĕнĕ хум" пултарулăх ăмăртăвне, "Чăваш Республикин чăвашлăха аталантаракан чи лайăх шкулĕ" конкурс ирттерме хатĕрленнине пĕлтерчĕ.

Ĕç планне çирĕплетнĕ хыççăн комитетăн çĕнĕ йышне пăхса тухрĕç. Кунта Вĕренÿ институтĕнче вăй хуракан Юрий Виноградов, Анна Егорова, Ирина Степанова, И.Я.Яковлев ячĕллĕ ЧППУ доценчĕ Татьяна Денисова, ЧР пултаруллă вĕрентекенĕсем Евгений Майков, Альбина Ишова, Светлана Тяхмусова, Александр Степанов,Татьяна Петрова тата Вера Фомина кĕчĕç.