Тĕнче тетелĕнче Чăваш Енре патшалăхăн икĕ чĕлхипе усă курнине хаклакан мониторинга халалланă блог тунă. Хальлĕхе pertanlah журналта (чăвашла «пĕртанлăх» — «равноправие») 700 ытлă сăнӳкерчĕк пичетленнĕ. Унта чăваш тата вырăс чĕлхипе ăнăçлă усă курнисем те, республикăри чĕлхе саккунне пăснă тĕслĕхсем те пур.

Журнал авторĕсем палăртнă тăрăх, çакна Чăваш Республикинчи патшалăхăн икĕ чĕлхине пĕр тан усă курманнине кăтартас тĕллевпе йĕркеленĕ. Тĕслĕхсем илсе кăтартнă.

«Чылай чухне пĕр чĕлхепе çеç усă кураççĕ. Вăл — ялан тенĕ пекех вырăс чĕлхи. Çапла майпа граждансен прависене пăхăнмаççĕ. Ку Чăваш Республикин сакунне пăсни те. Саккун патшалăхан икĕ чĕлхи те пĕр тан пулнине калать», — тенĕ журналта. Тĕслĕхрен, çул çинчи паллăсене вырăсла çеç çыраççĕ.

«Юлашки 20 çулта çул çинчи чылай палла, урам, общество чарăнăвĕсен ячĕсене улăштарнă, патшалăх учрежденийĕсен умĕсене юсанă, — тенĕ блогра. — Анчах хăш-пĕр çĕрте çеç çакăнпа усă курса объект ячĕсене вырăсла та, чăвашла та çырнă. Тĕслĕхрен, патшалăх çурчĕсене, автостанцисене, спорт центрĕсене уçнă чухне алăк çинче чăвашла-вырăсла çырнă пĕчĕк вывескăсене çеç курнă эпир. Етĕрне хулинче, унти халăхăн 66 проценчĕ чăваш пулин те, вырăнти тӳре-шара 1990 çултанпа урам, чарăну ячĕсене çырнă чухне патшăлăхăн икĕ чĕлхипе усă курмашкăн май тупайман-ха».

«Çурт умĕнче икĕ чĕлхепе çырнине кураймасан шалта кунашкаллине тупма тата йывăртарах, — çырнă малалла журналта. — Ачасене воспитани памалли вырăнсенче, культура керменĕсенче, парксенче, ача-пăча поликлиникисенче пĕр чĕлхепе усă курни çеç ытларах шухăшлаттарать».

Мониторинг ертӳçисем вывескăсене икĕ чĕлхепе тумашкăн укçа-тенкĕ кирлине тунмаççĕ. Анчах кивĕ табличкăсене планпа килĕшĕллĕн улăштарнă чухнех икĕ чĕлхепе çырсан укçа самай перекетленине палăртнă. Вĕсем транспортра вырăс тата чăваш чĕлхисемсĕр пуçне ытти чĕлхепе усă курнине хирĕç мар-мĕн.

Pertanlah блога икĕ чĕлхепе йĕркелесе пыраççĕ.