«Хыпар» хаçат пĕлтернĕ тăрăх, 2012 çулхи утăн 17-мĕшĕнче чăваш чĕлхин паллă тĕпчевçи, филологи ăслăлăхĕсен кандидачĕ, Чăваш Республикин тава тивĕçлĕ культура ĕçченĕ Анатолий Ермолаевич Горшков доцент пирĕнтен яланлăхах уйрăлса кайрĕ.
Анатолий Ермолаевич Горшков 1931 çулхи кăрлачăн 5-мĕшĕнче Муркаш районне кĕрекен Вускасси ялĕнче хресчен çемйинче кун çути курнă. 1938 çулта Сăпайкассинчи пуçламăш шкулта, унтан Калайкассинчи çичĕ çул вĕренмелли, Ишлейри вăтам шкулсенче ăс пухать. 1949 çулхи кĕркунне Чăваш патшалăх педагогика институтне вĕренме кĕрет. Аслă шкула хĕрлĕ дипломпа пĕтернĕ хыççăн пĕр хушă Чăваш патшалăх кĕнеке издательствинче вĕрентӳпе педагогика литературин редакторĕнче ĕçлет. 1954 çулта педагогика институчĕн аспирантурине вĕренме кĕрет. Ăна пĕтернĕ хыççăн Анатолий Ермолаевич каллех издательствăна таврăнать, 1961-1965 çулсенче тĕп редакторта ĕçлет.
1964 çулта тĕпчевçĕ филологи ăслăлăхĕсен кандидачĕ пулса тăрать. 1965–1968 çулсенче — Чăваш АССР Министрсен Канашĕ çумĕнчи Пичет управленийĕн ертÿçи. 1968 çулта паллă, талантлă ăсчах чăваш чĕлхин аталанăвне малалла тишкерес ĕмĕтпе Чăваш АССР Министрсен Канашĕ çумĕнчи наука-тĕпчев институчĕн директорĕн çумĕнче ĕçлет. Унта вăй хунă вăхăтра А.Е.Горшков ăслăлăх енĕпе 100 яхăн статья пичетлет, кĕнекесем кăларать. Унăн «Мĕнле каласан тĕрĕс? Словарь-справочник» (1973), «Сăмах пултăр уçăмлă, шухăш пултăр витĕмле» (1980), «Чăваш чĕлхи: лексика, фразеологи, пуплев культури» (1997) монографисене вуламан çын çук-тăр. А.Е.Горшков чăваш чĕлхе вĕрентĕвĕнче пуçласа «Чăваш чĕлхин кĕске орфоэпи словарьне» тата «Чăваш чĕлхин фразеологи словарьне» çырса хатĕрлесе пичетлесе кăларать. 1982 çулта кун çути курнă «Чăвашла-вырăсла словарь» хатĕрлес ĕçре те тĕпчевçĕн тӳпи пысăк.
Юлашки вăхăтра А.Е.Горшков «Чăваш чĕлхи. Пуплев культури. Хăнăхтарусем», «Чĕлхе пĕлĕвĕн кӳртĕмĕ», «Чăваш чăлхипе вырăс чĕлхин шайлаштаруллă грамматики», «Чăваш чĕлхи, риторика тата пуплев этикечĕ», «Стилистика тата текстсен чĕлхине редакцилесси» ятлă вĕренӳ пособийĕсем çырса хатĕрлерĕ.
Паллă тĕпчевçĕ 1990 çулхи юпа уйăхĕн 1-мĕшĕнчен пуçласа 2011 çулччен И.Я.Яковлев ячĕллĕ Чăваш патшалăх педагогика университетĕнче ĕçленĕ.
А.Е.Горшковăн çутă сăнарĕ ĕмĕрлĕхех пирĕн чĕрере пулĕ.