Чĕлхе Мускава илсе çитерет теççĕ. Чĕлхе хутшăну хатĕрĕ кăна мар. Чĕлхе - хĕç-пăшал та, кăмăл-туйăм сипечĕ те, чун апачĕ те, культура аталанăвĕн никĕсĕ те. Чĕлхе - радио, телевидени, хаçат-журнал, Интернет никĕсĕ те. Чĕлхесĕр пурнăç çук, тĕрĕссипе каласан. Çак ырлăха халăх патне çитерекенни - чĕлхеçĕ. 

Кам вăл чĕлхеçĕ? Чĕлхеçĕ вăл - хăй вĕрентме тата тĕпчеме суйласа илнĕ чĕлхене тĕпĕ-йĕрĕпе пĕлекен, унăн вăрттăнлăхĕсене уçса пама пултаракан, унпа усă курса тĕрĕс воспитани паракан, чĕлхе аталанăвне тĕрĕс çулпа яракан, чĕлхене алла илсе, унпа усă курса çитĕнÿсем тăвакан... 

Чĕлхене аталантарас тата унпа анлă усă курас ĕçре  тăван чĕлхе вĕрентекенĕсен тÿпи уйрăмах пысăк. Вĕсем тăван чĕлхе сипетне ача чунĕ патне амăшĕпе тан çитерме тăрăшаççĕ, унпа вĕсене сапăрлăха хăнăхтараççĕ, халăх менталитетне çирĕплетеççĕ, тăван ен культурине алла илме никĕс хываççĕ. Чыс та мухтав  тăван чĕлхе вĕрентекенсене! Уяв ячĕпе чун-чĕререн саламлатпăр вĕсене. Çак пархатарлă ĕçре çитĕнÿсем, ăнăçусем тумашкăн ырлăх-сывлăх сунатпăр. (Ÿкерчĕкре - Красноармейски районĕн шкулĕсенче чăваш чĕлхи вĕрентекенсем.)