Çак уяв вĕрентекенсемшĕн те пысăк пĕлтерĕшлĕ. Пĕр енчен,  хăйсем ăс-тăн панă ачасем ÿссе çитĕнсе çын пулни учительсене савăнтарать. Тепĕр енчен - хурлантарать. Пĕр хăнăхнă, çывăхланнă ачасенчен (вĕсем хамăр ачасемех вĕт) уйрăлма пит йывăр. Шкул вăл – хăй пĕр тĕнче. Пысăк тĕнче. Ăслăлăхпа пултарулăх тĕнчи. Унăн хăйĕн Уставĕ, хăйĕн Правилисем, хăйĕн йĕрки. Унта – çĕршер ача шăпи, ăс-хакăлĕ, кăмăлĕ, таланчĕ. Çак ăс-тăн лаççинчен 6 çулхи вулама-çырма пĕлмен пĕчĕк ачасенчен пур енчен те çирĕпленсе-туптанса çитнĕ яшсемпе хĕрсем тухаççĕ. Ачаран Çын тăвасси вăл тĕлĕнмелле кăткăс ĕç. Хăйсен пурнăçне ачасене вĕрентес ĕçпе çыхăнтарнă пултаруллă педагогсем вара вĕренекенсемшĕн ырми-канми тăрăшаççĕ. Вĕсен Пысăк чĕрисенче пур ача валли те ырă сăмах, ăшă туйăм, çутă хĕлхем туллиех. Учитель вăл Ииусус Христос евĕр çын. Вăл ача тем чухлĕ йăнăшсан та ăна каçарать, усал тытмасть. Кирек хăçан та ача тÿрĕ çул çине тухасса шанать ĕненет. 

Акă, Красноармейски иккĕмĕш шкулĕнчен кăçал пурĕ 52 ача вĕренсе тухать. Манăн вĕсен ырăпа кăна аса илес килет. Уйрăмах - вĕренÿре хастаррисене. Учителе хăйсен тăрăшулăхĕпе тата тарăн пĕлĕвĕпе пулăшса пынисене. Ачасем пире педагогика ĕçĕн результатне тума пулăшаççĕ. Олимпиадăсенче, фестивальсенче, конкурссенче вĕсем хăйсен вĕрентекенне пĕтĕм вăй-халтан пулăшаççĕ. Акă вĕсем: Григорьева Наталия (11а), Женя Филимонова (11б), Марина Афанасьева (11б), Маргарита Иванова (11б), Андрей Яковлев (11б) тата ыттисем те. Пурнăç çулĕ такăр пултăр вĕсен.

Юлашки шăнкăрав» янăрарĕ те ĕнтĕ. Халĕ ачасем пĕрлĕхлĕ патшалăх экзаменĕсем тытма хатĕрленеççĕ. Пурне те экзаменсене йĕркеллĕ тытма, малалла вĕренме кĕме вăй-хал та ăнăçу сунатăп.