Ветерансем сахаллансах пыраççĕ

Вăрçă тени пулмасть-çке çухатусăр,
Вилнисене йĕрлевçĕсем шыраççĕ…
Таврăннисем те: е чăлах, е сусăр –
Ветерансем сахаллансах пыраççĕ.

Сыв юлнисем те халь хĕрÿ хевтесĕр,
Вăй-халĕсем кунсеренех ыраççĕ…
Пур пеккине ялан хисеплĕр эсĕр –
Ветерансем сахаллансах пыраççĕ.

Уяв çитсен, вĕсем çавах хаваслă,
Ват салтаксем те сухалне хыраççĕ…
Вĕсен сăмахĕ пирĕншĕн чăн аслă –
Ветерансем сахаллансах пыраççĕ.
 
Тепре чухне аса килет-ши яшлăх;
Вăййа тухма çĕн çăпата сыраççĕ…
Анчах хăйĕн ĕçнех тăвать-мĕн ватлăх –
Ветерансем сахаллансах пыраççĕ.

Пуçран тухмасть пуль ĕлĕкхи ĕçченлĕх:
Кирлех пулсан – каллех тырă выраççĕ…
Питех те шел, нумайăшĕн пĕчченлĕх,
Ветерансем сахаллансах пыраççĕ.

Манса пĕрин ятне те ан хăварăр,
Вĕсем çинчен ĕмĕрĕпех çыраççĕ…
Кирек хăçан çул парăр, вырăн парăр –
Ветерансем сахаллансах пыраççĕ.

Сăвă авторĕ - Нестер Янкас ячĕллĕ Преми лауреачĕ Николай Ершов-Янкер

Хыçсăмах: Çĕнтерÿ кунĕ кашниншĕн пысăк уяв. Çак чаплă уяв кунĕпе чун- чĕререн саламлатпăр сире, тăванăмăрсем! Çĕнтерÿ кунĕ пире çĕнĕ çитĕнÿсемпе çĕнтерÿсем патне илсе пытăр, пурăнма хавал парса тăтăр. Уяв ячĕпе сире пурне те!