Коммуникаципе информаци уçлăхĕнче çĕнĕ сайт - Красноармейски районĕнчи Нестер Янкас ячĕллĕ пĕрлĕхĕн сайчĕ - уçăлчĕ. Сайт Нестер Янкас ячĕллĕ пĕрлĕхĕн кулленхи ĕçĕ-хĕлне, кун-çулне, пĕрлĕх членĕсен пултарулăх аталанăвне çутатса тăма тивĕç. Вăл ытти сайтсенчен чăвашла пулнипе уйрăлса тăрать. Чăн чăвашла тунă сайтсем хальлĕхе пит сахал-ха Ку технологие алла илме те çăмăл мар, мĕншĕн тесен чăвашла шрифтсене Интернет чĕлхипе калаçтарма цифрăланă технологи аталансах çитеймен-ха. Анчах маттур чăваш ачисем тăрăшнипе (сăмахран, Платонов Леонид Илларионович, "Чăваш халăх сайчĕ" - http://chuvash.org/) чăваш текстне те Интернетра чăвашла калаçтарма пулать иккен. Кунсăр пуçне тĕрлĕрен программăпа ĕçлеме пĕлни кирлĕ. Чăтăмлăх, ĕçе тума ăнтăлни ку тĕллеве пурнăçа кĕртме май парать. Нестер Янкас ячĕллĕ пĕрлĕх сайтне уçаканĕ - Красноармейски иккĕмĕш шкулĕнче чăваш чĕлхипе литератури вĕрентекенĕ Михайлов Виталий Михайлович. Ăна пулăшаканĕ - Михайлов Алексей Витальевич, асăннă шкулта 8 класра вĕренекен. Ку вăл В.М.Михайловăн чăваш чĕлхипе тунă иккĕмĕш сайчĕ. Саламлатпăр ăна! Сайта аталантарма кăмăл тăвакансене нимене йыхăратпăр.
