Вĕрентекен пурнăçĕ хальхи саманара çăмăл теме çук. Уроксене хатĕрленесси, тĕрлĕрен хут ĕçĕ тăвасси, уроксем хыççăн ачасене канăвне йĕркелесси тата... — вуншар-вуншар ыйту тухса тăрать. Çав вăхăтрах харпăр хăй пĕлĕвне ӳстересси те чи çивĕччисенчен пĕри. Ăна ниепле те аякка хăварма пулмасть — кунта вĕрентекенĕн кулленхи пурнăçĕ, шалăвĕ, çемье пуласлăхĕн тĕп пайĕ.
Раççейĕн тĕрлĕ кĕтесĕсенче пурăнакан вĕрентекенсен пурнăçне çăмăллатас тĕллевпе нумай пулмасть çĕнĕ тетелти журнал тухрĕ. Вăл «Шкулта» ятлă, http://shkul.su адреспа вырнаçнă.
Владимир Андреев, тĕтелти журнала çутта кăлараканĕ каланă тăрăх чăвашла интернет журнал кăларас ĕмĕт унăн тахçанах пулнă. «Халĕ ку ĕçе пуçăнма вăхăт çитнĕ. Паллах, журнал пĕтĕмпех шкул тата шкул таврашĕнчи пурнăçпа çыхăннăскер пулĕ», — тет вăл 1-мĕш кăларăмăн кӳртĕм пайĕнче.
«Шкулта» журналпа пурте тӳлевсĕр паллашма, унти материалсене хăйсен ĕçĕнче усă курма пултараççĕ. 1-мĕш кăларăмра, сăмахран, чĕлхе урокĕсенче словарьсемпе усă курасси пирки, шкул ачисен тĕпчев ĕçĕсене йĕркелесси пирки, чăваш литературине вĕрентмелли урок тĕсĕсене, глюкоза пирки, чăваш чĕлхи кун-çулĕ пирки пĕлме пулать. Çавăн пекех кунта 3 уяв сценарийĕ вырнаçнă: Иван Яковлевпа çыхăннă уявăн, вăйă картин, чăваш литератури уявĕн. Хăш-пĕр статьяпа пĕрле хăтлавсем те пур — вĕсемпе те паллашма пулать.