Кĕçнерникун, акан 17-мĕшĕнче, Чăвашкино çуртĕнче Чăваш Республикинчи кино ӳкерекенсен пĕрлешĕвĕн черетлĕ пухăвĕ иртнĕ. Унта ятарласа пĕр ыйту кăна сӳтсе явнă — çу уйăхĕн 19–24-мĕшĕсенче Шупашкарта иртекен кино фестивальĕнче чăвашла киноматографине кĕртессине.

Пĕтĕм тĕнчери кино фестивальне 7 чăваш киновне тăратма йышăннă. Хальлĕхе, вăхăт иртсе кайнине пула, ку ĕçсем конкурс тулашĕнчисем пулĕç. Çак картинăсене кĕртнĕ: «Аксар» студи хатĕрленĕ «Чупкăн» тата «Франци хĕрĕ тыткăнларĕ чĕрене» илемлĕ фильмсене, «Салам» студи ӳкернĕ «Юхха» фильма, «Орион» кăларнă «Манăн та телейлĕ пулас килет» картинăна, «Спектр» студин «Последняя кража» ĕçе (ăна вырăсла ӳкернĕ). Ку выляв фильмĕсем пулчĕç, çавăн пекех 2 документаллă ĕçе хушĕç: Пĕрремĕш наци киностудийĕ «Чăвашфильм» ăсталанă «Генерал Тихонов» тата «Муса Мусалиев: Путь воина» фильмсене. Ку икĕ картина та Юрий Спиридонов режиссёр ĕçĕсем.

Чăваш Республикинчи кино ӳкерекенсен пĕлтешĕвне кăçал пуш уйăхĕнче йĕркеленнĕ. Унăн ертӳçи пулма Олег Михайлович Цыпленкова суйланă. Хăйĕн ĕçĕнче çак пĕрлĕх Шупашкарта кино тата видео ӳкерекенсене пĕрлештерсе тăрать. Çак организацие Чăваш Республикин культура министерстви, электронлă информаци архивĕ йĕркелеме пулăшнă. Хальлĕхе 7 учредитель: Оринов Вячеслав, Алексей Иванов-Сĕрмек, Олег Цыпленков, Алексей Ефремов, Медведев Николай, Сергеев Юрий, Ефремов Константин. 2015 çулта пĕрлĕх Шупашкарта Чăваш кино фестивальне (Пĕтĕм тĕнчери кино фестивалĕсĕр пуçне) ирттерес шухăшлă. Çак ĕçе йĕркелеме мероприятин Йĕрки-шывне (положенине) Вячеслав Оринова хатĕрлеме панă.

http://www.chuvash.org/news/5612.html