2010 çулхи нарăсăн 3-мĕшĕнче Чăваш Республикин вĕренÿ институчĕн чăваш чĕлхипе литератури кафедри «10-11 классен чăваш литератури учебникĕсемпе хрестоматийĕсем» темăпа çавра сĕтел ирттерет. Тĕл пулу 11 сехет те 30 минутра пуçланать. Çавра сĕтел тĕллевĕ – авторсене учебникпа хрестоматисен çĕнĕ кăларăмĕ валли сĕнÿ парасси. Калаçăва кашни районтан 2 специалиста чĕнетпĕр. Сĕнÿсене çырса килмелле, тухса калаçма хатĕрленмелле.

2010 çулхи кăрлачăн 11-мĕшĕнче чăваш чĕлхипе литератури кафедрин ларăвĕ пулчĕ. Ларура сÿтсе явнă ыйтусенчен пĕри Чăваш Республикин Президенчĕ Н.В.Федоров Чăваш Республикин патшалăх канашне янă çырăвĕ пулчĕ.
Ларура Президентăн Çырăвĕ учитель умне çĕнĕ вăй çинче аталанакан çывăх тата инçет пуласлăха уçса панине палăртрĕç. Малашне пирĕн кивĕлле шухăшлава пăрахăçлама пулăшакан мелсем шыраса тупмалла. Вĕренÿпе методикăри çĕнĕлĕхсене шкулта анлă сармалла. Ку ĕçре пичет вăйĕпе усă курмалла.

Кафедра сĕнĕвĕсем:

1) Президент Çырăвĕнче каланă шухăшсемпе учительсемпе ирттерекен лекцисемпе практика занятийĕсенче усă курас;

2) Çырупа чăваш литератури урокĕсенче усă курас енĕпе Н.Г.Иванова хатĕрленĕ меслет сĕнĕвне ырлас;

3) Л.Г.Петрова методист Президент усă курнă ваттисен сăмахĕсем çинчен хатĕрленĕ статьяна «Халăх шкулĕ» журналта пичетлесе кăларас.