Чăваш Республикин тăваттăмĕш суйлаври Патшалăх Канашĕн черетсĕр 27-мĕш сессине уçса Михаил Михайловский спикер «черетсĕр» ăнланăвăн пĕлтерĕшне уçăмлатрĕ: республика Правительствин Председателĕ пулнă Сергей Гапликов урăх ĕçе куçнă май /Раççей Федерацийĕн Правительствин вице-премьерĕн - Раççей Правительствин Аппарачĕн ертÿçин Сергей Собянинăн пĕрремĕш çумне уйăрса лартнă. Владимир Путин Хушăва алă пуснă самантран Сергей Гапликов социаллă пурнăçпа экономика блокĕн департаменчĕсен ĕçĕшĕн яваплă. - Ю.Л./ Чăваш Ен Президенчĕ унăн отставкине йышăннă. Унăн тивĕçĕсене пурнăçлама Чăваш Республикин Министрсен Кабинечĕн Председателĕн çумне - Чăваш Республикин сывлăх сыхлавĕпе социаллă аталану министрне Нина Суслоновăна шаннă. Премьер отставкăна кайнă май Правительство членĕсем хăйсен тивĕçĕсене Министрсен Кабинечĕн çĕнĕ йышне йĕркеличчен пурнăçлаççĕ.

Чăваш Ен Президенчĕ Николай Федоров Республика парламентне Чăваш Республикин Министрсен Кабинечĕн Председательне çирĕплетме Нина Владимировна Суслонова кандидатурине сĕннĕ.

Сессин кун йĕркине çирĕплетнĕ хыççăн Михаил Михайловский республика ертÿçине сăмах пачĕ. Николай Федоров Президент Нина Суслоновăна республикăра та, унăн тулашĕнче те аван пĕлнине палăртрĕ. «Нина Владимировнăна Раççей Правительствинче ĕçлеме темиçе хут та чĕннĕ, - терĕ Николай Васильевич. - Анчах ăна Чăваш Ен шăпи, унта пурăнакансен пуласлăхĕ ытларах кăсăклантарнăран вăл сĕнÿсене йышăнман. Пуçаруллă, пысăк шайлă ертÿçĕ, тивĕçĕсене чыслăн пурнăçлакан, яваплăха хăйĕн çинчен сирме тăрăшман çын... Нина Владимировна пĕлтерĕшлĕ тытăмсенчи нумай ыйтăва тĕрĕс татса парать. Халĕ ун çине тата пысăкрах яваплăх тиенет».

Нина Суслонова хăйĕн сăмахĕнче çакна палăртрĕ: «Енчен те эпир пĕр ушкăнпа, пур тытăм та тĕллевлĕ ĕçлесен республикăн социаллă пурнăçĕпе экономика тата демографи аталанăвĕнчи ыйтусене ăнăçлă татса пама пултарăпăр. Пур предприятие те тухăçлă ĕçлеттерме тăрăшăпăр. Çакăншăн пирĕн пуриншĕн те чылай вăй хума тата кашнин лăш курмасăр ĕçлеме тивĕ. Мĕн палăртни пурнăçланасса шанатăп...»

*****

Нина Владимировна Суслонова 1960 çулхи çурла уйăхĕн 9-мĕшĕнче Иркутск облаçĕнчи Мамакан поселокĕнче çуралнă. Ашшĕ-амăшĕ çемйипе Шупашкар ГЭСне тума Çĕнĕ Шупашкара куçса килнĕ. Хулари 5-мĕш вăтам шкул хыççăн Нина Владимировна И.Н.Ульянов ячĕллĕ Чăваш патшалăх университечĕн медицина факультетĕнче пĕлÿ пухнă, 1984 çулта «Сиплев ĕçĕ» специальноçа алла илнĕ. Диплом илсенех ăна аспирантурăна йышăннă, 1994 çулта кандидат диссертацине ăнăçлă хÿтĕленĕ. Тепĕр икĕ çултан Раççей Федерацийĕн Президенчĕ çумĕнчи Раççей Патшалăх службин академийĕнче вĕренсе «Юриспруденци» специальноçпа пĕлÿ илнĕ.

Нина Владимировна ĕç биографине Тюмень облаçĕнчи Нефтеюганск хулинчи «Юганскнефтегаз» производство пĕрлешĕвĕн медсанчаçĕнче пуçланă, ун хыççăн Çĕнĕ Шупашкарти хула больницин хĕрарăм консультацийĕн акушер-гинекологĕнче ĕçленĕ.

Н.В.Суслонова 1984 çултанпа 1996 çулччен сиплекен тухтăртан пуçласа сывлăх сыхлавĕн министрĕн пулăшуçи тата Чăваш Республикин Сывлăх сыхлавĕн министерствин управлени пуçлăхĕ таран ÿснĕ. Тăватă çул Чăваш Республикин медицинăн обязательнăй страхованийĕн фондне, 2000 çулхи нарăсран Чăваш Республикин Сывлăх сыхлавĕн министерствине ертсе пынă.

2005 çултанпа - Чăваш Республикин сывлăх сыхлавĕпе социаллă аталану министрĕ, 2007 çулхи кăрлачран - Чăваш Республикин Министрсен Кабинечĕн Председателĕн çумĕ - сывлăх сыхлавĕпе социаллă аталану министрĕ.

Чăваш Республикин Президенчĕн Н.Федоровăн 2010 çулхи ака уйăхĕн 2-мĕшĕнчи 34-мĕш Хушăвĕпе Н.В.Суслоновăна Чăваш Республикин Министрсен Кабинечĕн Председателĕн тивĕçĕсене пурнăçлама çирĕплетнĕ.

2002 çулта Н.В.Суслоновăна «Сывлăх сыхлавĕн отличникĕ» паллăпа наградăланă. 2005 çулта «Раççей Федерацийĕн тава тивĕçлĕ врачĕ» хисеплĕ ята тивĕçнĕ. 2010 çулта «Чăваш Республики умĕнчи тава тивĕçлĕ ĕçсемшĕн» орденпа чысланă.

Çемьеллĕ, хĕр пур.