Чӳкĕн 26-мĕшĕнче Шупашкарти Çеçпĕл Мишши ячĕллĕ кил-йыш вулав центрĕнче «Асамлăх çулĕ» кĕнекен хăтлавĕ (презентацийĕ) пулчĕ. Кĕнекене 2008-2009 çулсенче Chuvash.Org сайт урлă ирттернĕ литература ăмăртăвĕсенче малти вырăнсене йышăннă шкул ачисемпе вĕрентекенсен хайлавĕсенчен калăпланă. 2008 çулта фантастика конкурсĕ, 2009 çулта — «Халап хапха тăрринче» юмахсен конкурсĕ иртнĕ. Çак конкурссене Николай Плотников Chuvash.Org сайтăн тĕп администраторĕпе Çĕрпӳ районĕнчи Михайловка шкулĕн директорĕ Владимир Андреев йĕркеленĕ.
Николай Плотников конкурс ирттерме çăмăл марине, уйрăмах кĕнеке кăларма йывăр пулнине палăртрĕ. Анчах та çак ĕçе хăй кăмăлпа, юратса пурнăçланине пĕлтерчĕ. Конкурс вăхăтĕнче пухăннă ĕçсем хушшинче малти вырăнсене йышăннă хайлавсене кĕнекен халăх патне çитерме хутшăннă ытти çынсем те тухса сăмах каларĕç. «Асамлăх çулне» ӳкерчĕкĕсемпе илемлетме Çĕрпӳ районĕнчи Çырмапуç шкулĕнчи «Ăсталăх кĕперĕ» кружока çӳрекен ачасене явăçтарнă сăнарлă ăсталăх урокĕсене вĕрентекен, Çеçпĕл Мишши премийĕн лауреачĕ Станислав Юхтар кĕнекене капăрлатас ĕç мĕнлерех пулса пыни пирки кĕскен пĕлтерчĕ. «Асамлăх çулĕ» кĕнекен дизайнне тунă каччă, «Тăван ен» хаçат дизайнерĕ Виктор Бычков, пултаруллă вĕренекенсемпе вĕрентекенсене мухтарĕ, малашне те çитĕнӳсем тума, малалла тата пысăкрах çитĕнӳсем тума сунчĕ. Чăваш çамрăкĕсен «Сăвар» пĕрлешĕвĕн хастарĕ, кĕнеке кăларма укçа-тенкĕпе пулăшнă Патăрьел тăрăхĕн каччи Эдуард Николаев та конкурс çĕнтерӳçисен ĕçне халăх патне çитерес ĕçе хавхаланса, кăмăлтан хутшăннине палăртрĕ, хайлав авторĕсене çĕнтернĕ ятпа саламларĕ.
Хĕрлĕ Чутай районĕнчи Хусанушкăнь тĕп шкулĕнчи чăваш чĕлхипе литературине вĕрентекен Светлана Яруткинăпа çак районти Штанашри пĕтĕмĕшле пĕлӳ паракан шкулĕнче акăлчан чĕлхине вĕрентекен Галина Зотова конкурса хутшăнакансем патне пушă алăпа килмен, хăйсем кăларнă кĕнекесене парне тума илсе килнĕ.
Хăтлавра (презентацинче) Улатăрти чукун çул техникумĕн 2 курс студентки, конкурсра иккĕмĕш вырăннă йышăннă «Çăткăн кăмпасем» сăвă авторĕ Анна Васильева, Элĕк районĕнчи Тавăт вăтам шкулĕнче 9 класра вĕренекен, «Халап хапха тăрринче» конкурса иккĕмĕш вырăн йышăннă «Иленушкăнь» сăвă авторĕ Анастасия Федорова, Элĕк районĕнчи Чăваш Сурăм шкулĕнче чăваш чĕлхипе литературине вĕрентекен, «Халап хапха тăрринче» конкурса иккĕмĕш вырăн йышăннă «Карман ту» хайлав авторĕ Петрова Алина Геннадьевна хăйсен сăввисене чуна витермелле каласа пачĕç.
Паллă çыравçă, Çеçпĕл Мишши ячĕллĕ премии лауреачĕ Лидия Сарине хăтлава пухăннисене тав турĕ. Конкурссем йĕркелесе кĕнеке кăларас ĕçе арçынсем хутшăнни уйрăмах сăвăçăн кăмăлне кайнă. Вăл çак пархатарлă ĕç малалла аталанасса шаннине, шкул ачисемпе вĕрентекенсене хăйсен пултарулăхне кĕнекен кăларса нумай вулакан патне çитерме май туса пани питĕ ырă ĕç пулнине пĕлтерчĕ. Хальхи вăхăтра хайлав пичетлес ĕç тăкаклă, хаклă пулнине шута илсен маттур арсене пушшех те мухтамаллине палăртрĕ.
Чăваш халăх артисчĕ, паллă юрăç Иван Христофоров пултаруллă сăвăçăсемпе юмах-халап ăстисене мухтарĕ, ăнăçу сунчĕ, халăх юратакан хитре юрăсем шăрантарса уява илемлетрĕ.
Хăтлавра Чăваш чĕлхи тĕпчевçи, «Раççей ялĕсен энциклопедийĕ» (Мускав хули) ăслăлăх, культурăпа çут ĕç обществин регионти (Чăваш Енри) уйрăмĕн секретарĕ, Чăваш халăх сайчĕн ĕçне активлă хутшăнакан Сосаева Алина Аркадьевна, тĕрлĕ шкулсенчи вĕрентекенсем т. ыт. те тухса калаçрĕç. Хăтлава хайлавсен авторĕсем тата ăна кăларма пулăшнă пур çын та килсе çитнĕ, республикăн нумай кĕтесĕнчи шкул ачисемпе вĕрентекенсем йышлăн хутшăннă. Хăтлава килнисене пурне те конкурссене йĕркеленĕ Николай Плотников алă пуснă «Асамлăх çулĕ» кĕнеке асăнмалăх парне пулчĕ.