Нарăсăн 22-мĕшĕнче, Чăваш патшалăх гуманитари ăслăлăхĕсен институчĕн ăслăлăх канашĕн залĕнче Пĕтĕм тĕнчери тăван чĕлхе кунне халалласа анлă лару иртнĕ, ăна институтăн чĕлхе пĕлĕвĕн пайĕ йĕркеленĕ. 
Кун йĕркинче чăваш чĕлхин хальхи тăрăмĕпе пуласлăхне, тĕнчери тĕрĕк чĕлхисен аталанăвне халалланă ыйтусене сӳтсе явнă. 
Тухса калакансем шутĕнче истори пайĕн ертсе пыракан ĕçтешĕ Харитонова В. Г., этнологипе социаллă тĕпчевсен пайĕн ĕçтешĕ Эктор Алос и Фонт (вăл тухса калаçнине кунта вулăр), чĕлхе пĕлĕвĕн пайĕн ертсе пыракан ĕçтешĕ Егоров Н.И. тата ыттисем пулнă. Ыйтусене сӳтсе явма Валентина Кузнецова юрăç, ăслăлăхпа аталану енĕпе ĕçлекен директор çумĕ Николаев Г.А., «Вут-шу» чăваш çапăçу ӳнерĕн ертӳçи Романов А.Е. тата ыттисем хутшăннă. 
Харитонова В.Г. хăйĕн сăмахĕнче чăваш чĕлхи хальхи пурнăçра мĕнле вырăн йышăннине кăтартакан социаллă ыйтăмсен кăтартăвĕсемпе паллаштарнă. Николай Иванович вара докладра чăвашлăха аталантармалли ĕç-хĕле палăртнă. Валентина Кузнецова хăйĕн сăмахĕнче чăваш наци телекуравĕнче вырăс кăларăмĕсем ытла нумай пулнишĕн пăшăрханса калаçнă.