Трак енри шкулсенче чăваш чĕлхи вунă кунлăхĕ пуçланчĕ. Акă, Красноармейски иккĕмĕш шкулĕнче те администраципе тăван чĕлхе вĕрентекенсен творчествăлла ĕçлекен ушкăн ларăвĕнче чăваш чĕлхи вунă кунлăхĕн ĕç планне çирĕплетрĕç. Унта И.Я.Яковлев Аслă Вĕрентекене халалласа уроксем иртĕç. Класс тулашĕнче вара «Юхма Мишши çыравçăн нумай енлĕ таланчĕ» рефератсен конкурсĕ, «Юхма Мишши – чăвашсен паллă çыравçи» электронлă хаçатсен конкурсĕ, Яков Ухсай поэзине юратакансен «Акăш тĕкĕ евĕр эс çемçе…» илемлĕ вулав ăмăртăвĕ, сăвă çыракансен «Чăваш чĕлхи – анне чĕлхи» литература конкурсĕ, Трак тăрăхĕнче çуралнă Совет Союзĕн Геройĕ В.В.Васильев çуралнăранпа 100 çитнине халалланă «Мăн Шетмĕ паттăрĕ» викторина  пулĕ. Шкул вулавăшĕнче вара ачасем И.Я.Яковлев, Я.Г.Ухсай тата М.И.Ильин (Юхма Мишши) хайлавĕсемпе паллашĕç.

Ака уйăхĕн 21-мĕшĕнче шкулта Республикăмăрти районсем хушшинчи V «Çамрăк ăсчах» вăйă конкурс иртет. Унта юнашар районсенчи шкулсенчен килнĕ ачасем – инçет куçăмсăр вăйă конкурсăн пĕрремĕш турĕн çĕнтерÿçисем, чăваш чĕлхине чи лайăх пĕлекен вĕренекенсем хутшăнаççĕ.

Вунă кунлăх ĕçсен планĕпе килĕшÿллĕн ачасем Шупашкара, Чăваш драма театрне те  кайса килесшĕн. Вĕсем унта Трак ен тăрăхĕн Алманч енче çуралса ÿснĕ Александр Пăртта артист, драматург тата поэт çырнă пьеса тăрăх лартнă «Укçа чул кастарать» спектакле кайса курасшăн.

Вунă кунлăх Чăваш патшалăх символĕсен кунне паллă тунипе вĕçленет. Çав кун кашни класра Чăваш патшалăх Ялавĕпе  Гербĕн авторĕн Элли Юрьевăн пурнăçĕпе пултарулăхне çутатса паракан презентаци курма палăртнă.