Пушкăртстанăн конституци сучĕ республика пуçлăхне епле ят памаллине татса панă иккен. Малашне ăна республикăра Хаким тейĕç.
Пăхса тухнă вариантсем хушшинче çаван пекех «юғары вакил» (чăв. аслă хуçа), «башлыҡ» (чăв. «пуçлăх») пулнă иккен, анчах иккĕмĕшне депутатсем сивленĕ — вăл сăмахăн пушкăрт чĕлхинче тепĕр пĕлтерĕш пур имĕш — ача калпакне çапла калаççĕ. Румиль Азнабаев калашле вĕсем хăйсен пуçлăхне калпак ячĕпе каласшăн мар. «Хаким» вара пушкăрт чĕлхинче «ертӳçĕ», «аслă», «хуçа», «тӳре» пĕлтерĕшлĕ. Хальхи вăхăтра икĕ республикăсăр пуçне пуринче те хăйсен пуçлăхĕсене Президент ячĕпе каламаççĕ. Çак саккуна Раççей Президенчĕн вырăнĕнче Дмитрий Медведев пулнă вăхăтра йышăннăччĕ. Ун чухне чи малтан Çӳрçĕр Капкасри республика пуçлăхĕсем хăйсене Президент теме пăрахрĕç, каярах ыттисем те. Пушкăртсем те çак саккуна йышăнсан пĕр Тутарстан республики çеç тăрса юлĕ (Рустам Минниханов каланă тăрăх вĕсем те ку ыйтупа ĕçлеççĕ имĕш). Каласа хăварас пулать, Пушкăртстан пуçлăхне вырăсла çавах та «Глава» тейĕç. Ку ĕнтĕ Якутири пекех — унти пуçлăха якутла «Ил дархан» теççĕ, вырăсла вара «Глава» тениех. Чăваш Республикинче те хальхи вăхăтра чăвашла «Пуçлăх», вырăсла «Глава».
http://www.chuvash.org/news/4571.html Çыпăçтарнисем: |
