– Чăнах та, музыка пĕлĕвĕ çук манăн, эпĕ икĕ кун çӳренĕ музыка шкулне (кулать). Шкулта вĕреннĕ чухне эпир ушкăн аталантарса ятăмăр. Кайран вара, ЧПУра чăваш филологийĕпе культура факультетĕнче вĕреннĕ чухне, дуэт йĕркелерĕмĕр. Çапла пуçланса кайрĕ те манăн артист пурнăçĕ.
– Пирĕн вулакансем интересленеççĕ: «Московский» – вăл Елчĕк каччин чăн хушамачĕ е хушма ят?
– Московский вăл – чăн хушамат. Манăн мăн асатте Мускавра патша патĕнче 25 çул хĕсметре тăнă. Унтан яла таврăнсан ăна Мускав Иванĕ тесе чĕнме пуçланă. Çапла ĕнтĕ пирĕн хушамат йĕркеленнĕ. 
– Юрланисĕр пуçне эсĕ ăçта тата кам пулса ĕçлетĕн? 
– Эпĕ ăс енĕпе кая юлса пыракан ачасен шкулĕнче ĕçлетĕп. Вĕсене актер ăсталăхне, юрлама вĕрентетĕп. Ачасем гитара, балалайка лайăх калаççĕ. Çав ачасен пичĕсем çинче йăл кулă курсан, манăн хамăн та чун савăнать.
– Хăв гастроле тухса кайсан вĕсене кам вĕрентет?
– Ачасем пĕлеççĕ эпĕ юрăç пулнине. Вĕсене урăх никам та вĕрентмест. Мана кĕтеççĕ.
– Эсĕ шоу-бизнесра пĕрремĕш çул мар. Чăваш артисчĕсенчен кама палăртма пултаратăн?
– Сергей Павлов, Вячеслав Христофоров сцена çинче хăйсене мĕнле тытни, вĕсем концерчĕсенче куракансене хавхалантарни кăмăла каять.
– Юлашки вăхăтра эсĕ вырăсла та юрланине асăрхарăмăр. Мĕнпе çыхăннă çакă тата чăваш концертĕнче вырăсла юрлани пирки мĕн шутлатăн?
– Вырăсла юрлама рейтинга ӳстерес, концерта вырăссем те çӳреччĕр тесе тытăнтăм. Чăваш концертĕнче пĕр-икĕ юрă вырăсла юрласан пăсмасть. Халĕ нумайăшĕ çапла тăваççĕ ĕнтĕ. Анчах та ытларах чăваш юррисем çине пусăм тумалла тесе шутлатăп. 
– Эсĕ çемье çавăрнă çын. Каласа пар-ха хăвăн çывăх çыннусем çинчен?
– Манăн арăм – Регина, ырă кăмăллă, яланах мана ăнланать, пулăшать. Ноябрĕн 19-мĕшĕнче эпир пĕрлешни 4 çул çитрĕ. Ывăл – Богдан, 3 çулта, садика çӳрет. Пĕчĕк хĕр – Яна, 7 уйăхра.
– Тата нумай çынна кăсăклантаракан ыйту. Эсир Алексей Шадриковпа мĕнле хутшăнура? Сире конкурентсем теме пулать-и?
– Пире, чăнах та, Шадриковпа конкурентсем тесе шутлаççĕ. Çак йăнăш шухăша сирес тесе 2 çул каялла эпир пĕрле концертсем ирттереттĕмĕр. Çывăх юлташсем тесе калаймастăп, çапах та конкурентсем те мар. Йăлтах лайăх.
– Сирĕн гастроль турĕсем вăрăм. Уйăхне миçе кун килте пулатăр?
– Чăнах та, концертсем нумай. Уйăхра 7-10 кун килте пулмастпăр та пулĕ. Акă халĕ те Тутарстанра пĕр эрне юрлатпăр: Аксура, Нурлатра, Анат Камăра, Элметре, Çырчаллинче пултăмăр. Пире пур çĕрте те ăшă кăмăлпа кĕтсе илеççĕ. Çырчаллинче вара эпĕ хама килти пек туятăп. Çак хулара çав тери кăмăллă чăваш каччисемпе хĕрĕсем. Концертсем хыççăн нумай ăшă туйăм юлать. Çакăншăн тавтапуç. Тата «Сувар» хаçата пысăк ăнăçу сунатăп. Яланах çакăн пек кăмăллă пулăр. Вулакансем нумай пулччăр.