(05.04.2009 11:39)  Трак ен тăрăхĕнче Красноармейски районĕнчи Янкас ялĕнче çуралса ӳснĕ чăвашсен паллă поэчĕ Нестер Янкас çуралнăранпа 100 çул çитнине халалланă ĕçсем вĕçленмен-ха. Акă, хальхи кунсенче республикăри районсем хушшинче шкул ачисен Интернет урлă ирттерекен инçет викторина пырать. Ăна йĕркелекенĕ — Красноармейски иккĕмĕш шкулĕнче чăваш чĕлхипе литератури вĕрентекен, Нестер Янкас ячĕллĕ Преми лауреачĕ Виталий Михайлович Михайлов. Викторина хуравĕсем шкул сайчĕ урлă килеççĕ. Паянхи куна 59 хурав килнĕ те ĕнтĕ. Викторина Чăваш чĕлхи кунĕ умĕн ака уйăхĕн 23-мĕшĕнче вĕçленет.
  Ака уйăхĕн 6-мĕшĕнчен пуçласа 23-мĕшĕччен районти шкулсенче чăваш чĕлхине чи лайăх пĕлекен аслă класра вĕренекенсем хушшинче "Çамрăк ăсчах" вăйă-конкурс иртмелле. Ку конкурса та Виталий Михайлович Михайлов учитель йĕркелесе пырать. Вăл виçĕ турпа иртет. Пĕрремĕш турĕ шкулсенче иртет, унта шкулти чăваш чĕлхине чи лайăх пĕлекен ачана суйласа илеççĕ. Иккĕмĕш турта вара виççĕмĕш тура лекессишĕн тупăшаççĕ. Виççĕмĕш турĕ ака уйăхĕн 23-мĕшĕнче пулать. Вăл чăваш чĕлхине чи лайăх пĕлекен 5 ача хушшинче иртĕ. Ку конкурс виççĕмĕш çул иртет ĕнтĕ. Виçĕмçул «Çамрăк ăсчах-2007» ята Трак чăвашла-нимĕçле гимнази вĕренекенĕ Татьяна Степанова çĕнсе илнĕччĕ. «Çамрăк ăсчах-2008» ята Пикшик шкулĕн вĕренекенĕ Надежда Анисимова тивĕçнĕччĕ.
  Ака уйăхĕн 23-мĕшĕнче Красноармейски иккĕмĕш шкулĕнче пысăк уяв пулать. Ăна Чăваш чĕлхи кунне тата чăваш чĕлхин вунă кунлăхне халалланă. Уява пичет ĕçченĕсем, районти шкулсенче чăваш чĕлхипе литератури вĕрентекенсем, Нестер Янкас ячĕллĕ Преми лауреачĕсем, "Кăмăл" литературăпа краеведени вĕренӳ пĕрлешĕвĕн членĕсем хутшăнаççĕ.
  Ака уйăхĕн 25-мĕшĕнче вара чаплă лару-тăрура инçет викторинăпа вăйă-конкурса пĕтĕмлетеççĕ.

http://chuvash.org/