Виҫӗ ҫул каялла ҫеҫ шкул пӗтернӗ те ҫак сериалпа кӑсӑклансах кайрӑм. "Мӗнлерех сӑнлаҫҫӗ паянхи вӗренекенсен пурнӑҫне экран ҫинче? Мӗнле сывлать XXI ӗмӗрӗн ывӑлӗ-хӗрӗ?"
Темӗнле шанчӑкпа, хаваслӑ кӑмӑлпа ҫутрӑм ҫав кун телевизора. Ҫутрӑм, кайран хытах ӳкӗнтӗм. "Килпетсӗр! Несӗпсӗр!" - теес килчӗ пуҫламӑшӗнчех.
Тӑххӑрмӗшпе вуннӑмӗш классенче вӗренекенсем - тӗп геройсем. Вӗрентекенсем - таҫти хыҫалти планра. Ним вырӑнне те хумаҫҫӗ-ҫке вӗсене ачасем: кулаҫҫӗ, итлемеҫҫӗ. Урокпа тӑхтав хушшинче уйрӑмлӑх та ҫук тейӗн...
Шкул умӗнче пирус тӗтӗмӗпе чыхӑнаҫҫӗ "маттурсем", шалта та йӑсӑрлантармалли кӗтес пур вӗсен. Ҫӳлти хута чӑхсем кашта ҫине пуҫтарӑннӑ пек пухӑнаҫҫӗ. Пуҫланать вара канашлу!.. Кам ӗнер ӑҫта "бухал", кама "предки достали", камӑн ҫӗнӗ джинс шӑлавар : илме укҫа ҫук, кам кампа тӗл пулать. Кашни предложенирех килпетсӗр сӑмахсем. Ҫитӗннисем хисепре мар. Ашшӗ-амӑшӗ те, аслашшӗ-асламӑшӗ те ним ӑнланмаҫҫӗ,  пурнӑҫран юлнӑ иккен ачасен шучӗпе. Уроксене хатӗрленес вырӑнне пӗлӳ ҫуртӗнчех тӗрлӗ намӑс ӗҫпе аппаланма именмеҫҫӗ, пёр-пӗринпе "ҫуллашса" тӑраҫҫӗ. Хирӗҫленине  итлесшӗн мар. "Сирӗн ӗҫ ҫук, ан чӑрмантарӑр!" - теҫҫӗ.
Мӗнле пурнӑҫ пулса кайрӗ? Нивушлӗ ыррипе таси аса илӳре ҫеҫ юлӗ? Ҫапла, кӑмӑл-сипет ҫинчен манса пыратпӑр. Ку юхӑм тата вӑйланса, сарӑлса пытӑр тесе тӑрӑшакансем : те пур авӑ! Намӑссӑр киносем ӳкерсе ҫавна ҫӗр-шывӗпех кӑтартаҫҫӗ. Ҫитменнине, кунне иккӗ ҫавӑрттараҫҫӗ.
Нумай шӑв-шав ҫӗклерӗ аслӑрах ҫултисем валли йӗркеленӗ "Дом-2" проект (ТНТ). "Школа" та ҫавӑн евӗрлӗ япалах мар-ши? Анчах шкул ачисем валли хатӗрленӗскер. Мӗн пытармалли, чӑнах та, ҫакӑн пек кӑларӑмсем курса пушшех пӑсӑлать ҫамрӑк ӑру. Тӗслӗх илеҫҫех унти геройсенчен.
Ним ыррине те вӗрентмест "Школа" телесериал. Мӗншӗн ӑна хирӗҫ тӑмастпӑр-ха эпир? Унта та кунта - капкӑн. Йӑнӑш пусатӑн - ҫакланатӑн. Мӗн чӑрмантарать пире танатаран хӑтӑлма? Хӳтӗлесе хӑварасчӗ ешӗл калчана пӑрпа сивӗ ҫумӑртан.

Ольга АВСТРИЙСКАЯ