Авăн уйăхĕн 20-мĕшĕнчен пуçласа юпан 25-мĕшĕччен тĕнче тĕтелĕнче чăваш вĕрентекенĕсен интернет педканашĕ ĕçлĕ. Ку канашлу тăваттăмĕш хут иртет. Кăçалхи форума ирттерме ятарласа çĕнĕ сайт уçнă. Унта
http://pkanash.chv.su/ каçăпа кĕме пулать.
Педканаша Чăваш Республикин вĕренӳ тата çамрăксен политикин министерстви, Вĕрентӳ институчĕ, Чăваш халăх сайчĕ тата Чăваш чĕлхин инçет вĕренӳ центрĕ ирттереççĕ. Виçĕмçулхи педканаша 72 педагог хутшăннăччĕ, пĕлтĕр канашлăва хутшăннисен хисепĕ 101-пе танлашрĕ. Юлашки виçĕ çул хушшинче форума хутшăнакансем вăл е ку ыйтупа 700 хут ытла сăмах илнĕ.
Виçĕ çул хушшинче Чăваш Республикин пур районĕнчи педагогсем форумпа тухса калаçнă, унсăр пуçне Чĕмпĕр, Тутарстан тата Пăшкăрт Республикин тăрăхĕсенчи чăваш педагогĕсем те педканашра хăйсен сăмахне каланă.
